No.4306/2021-2022
Aizawl the 17th March, 2022: Vawiin khan Mission Foundation Movement hnuaia MFM School of Nursing (ANM) chuan Capping and Lamp Lighting Ceremony vawi 13-na anmahni building, Durtlangah an hmang a. Deputy Chief Minister Pu Tawnluia chu khuallian a ni.

Pu Tawnluia chuan Mission Foundation Movement-in Pathian rawngbawlna atana remchang tak Nursing School an din chuan tluang taka kum 13 hmel a lo hmu ta chu lawmpuiin ANM zirlai thar vawiina lukhum khumtir tak te chu duhsakna a hlan a. MFM hmalakna avangin mi tam takin eizawnna an neih phah a, Mizo thalaite tan an hnathawh hi a ropui tak zet a ni, a ti. Deputy Chief Minister chuan ram hmasawnna atana pawimawh ber chu mihring dam hriselna hi a ni a, Covid Hripui avanga harsatna kan tawh lai pawha pawimawh ber te zinga mi chu health services a ni, tiin Health Sector a thawktu Doctor, Nurse leh Health Worker zawng zawng te thawhrimna avangin hripui pawh kan do thei a ni, a ti a. Hetianga uluk taka Nurse te train chhuak tu Institution changtlung tak an nei chu lawmawm a tih thu sawiin an kal zelna turah duhsakna Pu Tawnluia chuan a hlan a ni.

Vawiin programme-ah hian ANM zirlai thar mi 20 chu Pi Lalchhanhimi, Mizoram College of Nursing (MCON) Principal chuan lukhum a khum tir a. MFM School of Nursing zirlai titha, kum kaltaa Mizoram Nursing Council hnuaia exam beitu zingah top ten a tling mi pathum hnenah Pi Thanpari Award hlan a ni a. Award dawngtute chu Caroline Lalrinpuii, C.Lalrinmawia leh Krawsthangmawii te an ni. Anni hian 5-na, 8-na leh 9-na dinhmun an hauh a; cheng 5000, cheng 3000 leh cheng 2000 an dawng a ni.

MFM School of Nursing (ANM) hi kum 2009 din a ni a, he School atang hian zirlai 254 an zirchhuak tawh a ni. Indian Nursing Council in Health Worker Syllabus a duanchhuah anga zirtirna pek an ni a. Indian Nursing Council leh Mizoram Nursing Council phalna leh pawmpuinaa din niin kum tin zirlai 20 zel lak phalsak an ni.

MFM School of Nursing (ANM) 13th Capping and Lamp lighting Ceremony ah hian MFM Executive Secretary Pu Zalianthanga’n kalkhawmte lawmna thu a sawi a, Pu Sanghmingthanga H Pautu chuan Pi Thanpari Award semna hun hmangin MFM Director Pu R.Vanlalzauva’n lawmthu sawiin hun hnung a khar a ni.