No.4307/2021-2022

Aizawl, the 17th March, 2022: India rama TB natna umbo beihpui thlakna ‘Aashwasan Campaign‘ chu vawiin khan Serchhip TB Centre ah Dr. Lalzawmi, Chief Medical Officer Serchhip District chuan a hawng.

Dr. Lalzawmi, CMO Serchhip chuan World Health Organisation (WHO) in khawvelah TB natna umbo a tumna kal zelah Kum 2025 ah India ram atangin TB natna umbo a tuma, chu hmalakna kal zelah chuan Aashwasan Campaign Programme pawh neih a ni a. Sawrkar laipui chuan India rama District hrang hrang 100 ah nasa taka tan lain, heng District 100 (Tribal Area ah) zingah hian Serchhip District pawh kan tel ve a ni, a ti. India ramah Zawng hri (Small Pox) leh Zeng Hri (Polio) te umbo alo nih tawh a, khawvel ram hrang hrang kan inkalpawh nasat tawh avangin Zeng Hri (Polio) laka kan him zelna nan Zeng Hri danna erawh sawrkarin ala kalpui chunzawm zel thung. Sentut (Measles) natna pawh umbo leh tuma theihtawp chhuah mek a ni bawk. TB natna hi langchhuak lova lo vei ru reng awm theih anih avangin TB natna veite zawnchhuahna tura hmalak hi a tul hle a, a zawnchhuah lam kan chak hian a umbo lama hmalak a kal chak dawn tihna a ni a, thawktute pawhin thahnemngai taka he hmalakna hi kan thawh a tul hle a ni, tiin, Serchhip District chhung RD Block Block pahnih – Serchhip RD Block leh E.Lungdar RD Block huamchhunga hmala turte chu tluang tak leh tha taka thawk tura duhsakna a hlan a ni.

He hunah hian Pu H. Laltanpuia, Dot-Plus Supervisor, Serchhip TB Centre hnen atangin TB Natna chungchanga Serchhip District dinhmun tlangpui ngaihthlak a ni a, kum kalta 2021(Jan-Dec) chhung khan Serchhip District-ah TB vei mi 66 hmuh chhuah anih thu leh chung zinga mi 45 te chu Chuap TB midang kai chhawng thei an nih thute, Chuap pawn lama vei mi 21 an awm thu leh mi 4 in an thih pui thute bakah mi 52 in tha taka TB damdawi an ei zawh thu a sawi a. Kumin January thla atanga vawiin thlengin Serchhip Districtah TB vei mi 14 hmuh chhuah tawh anih leh thu leh chung zinga mi 9 te chu Chuap TB leh Chuap pawn lam mi 5 awm thute, mi pakhatin TB natna a thih pui tawh thu te a sawi bawk.

He hun hi Dr. ZD Lalmuanawma, District Medical Superintendent chuan a kaihhruai a, Piramal Swasthya, 100 days ACF hian a tum ber chu TB veite hmuh chhuah leh enkawl a nih thu leh Chumi tur chuan ni 100 chhungin Plan mumal tak hmanga Survey neih anih tur thu a sawi a, Serchhip District-ah 28th Feb atanga 13th March chhung khan SNC (Sub-National Certificate for TB free District) neih a lo nih tawh thu leh WHO hnuaia NIRT (National Institute for Research in Tuberculosis) leh ZMC te nen tangkawpin khaw thlan bik thenkhatah survey neih anih thute, mi 3775 interview ah mi 84 te Khak endik sak an nih thu leh chung zingah chuan TB vei hmuh chhuah an awmloh thu a tarlang a ni.

Pu Lalawmpuia Sailo, District Supervisor chuan lawmthu sawia kharin, Programme zawhah hian Pu Lalnunsanga, Senior Laboratory Technician hovin Serchhip District chhunga TB veite zawnchhuah leh enkawl dan tur chungchang ah Training neih chhunzawm nghal a ni.