No.4308/2021-2022

Aizawl, the 17th March, 2022: Vawiin chawhma dar 11 khan Mizoram Sawrkar Planning & Programme Implementation Department (Research & Development Branch) leh District Planning Committee tangkawp bultumin Champhai Vengthlang YMA Hall-ah Champhaia Sawrkar Department hotute, NGO hrang hrang hruaitute leh District chhunga VC te tan hmasawnna tluantling leh ngelnghet a awm theih nana hmalak dan tur inzirtirna 'Workshop on Implementation, Monitoring and Localisation of Sustainable Development Goals (SDGs)' buatsaih a ni. District, Block leh Village Level tana SDGs Workshop huaihawt hi District Planning Committee Chairman Pu Henry C.Lalrawnkima, District Bawrhsap chuan a telpui a ni.

Pu Henry C. Lalrawnkima chuan Planning & Programme Implementation Department mithiamte'n Champhai kalchilha training an buatsaih chu lawmawm tiin, a hlawhtlin theihna kawnga tha thawhtute leh kalkhawmte chu fakawm a tih thu a sawi a. Sustainable Development Goals chu hmasawnna ngelnghet, kumhlun leh intungnung thei nei tura tanlakna a nih thu sawiin, hemi kaltlanga tihhlawhtlin tum hrang hrangte chu awm hmun, ram leh mihring chengte a zir zela herrem a duhawm thu sawiin, hmanraw neih leh mamawhte a inchen tlan vek loh avangin kan dinhmun theuhte thlir chunga ngaihtuahna zau tak sen a tul a ni, a ti a. Hmasawnna tluantling leh awmze nei, nakin zela nghawng thalo siamlo tur leh chhawr tangkai theih tur siam kawngah tanlak a pawimawh thu tarlangin, he huna tel District chhunga Department hotute leh khawtlang mirawn hrang hrangte chu tha taka ngaithla tura chahin an hmalakhona chuan awmze thui tak a neih ngei a beisei thu a sawi bawk.

Hmasawnna ruhrel siam leh enkawl kawngah thang lo thar leh zel turte hmakhua leh damkhawchhuahna tur ngaihtuah ran chunga hmalak a tul thu pawh sawiin, tuna nawmsak ngaihtuah vanga nakin zela nghawng tur ngaihtuah lek lova kan duhthua Sustainable Development Goals kalhtlata hma kan lak hian rah thalo tak a chhuah thei a ni, a ti a. Champhai District chu Sustainable Development Goal hrang hrangte hlawhtling taka kalpuitu leh hmingtha, District dang, State leh rampum huapa entawntlak a nih theih nana theihtawp chhuahpuiah kalkhawmte a sawm a ni.

He hun hi Pu Obed Lalmalsawma, SDC chuan kaihruaiin, Planning & Programme Implementation Department atangin Pu Isaac Lalmuanpuia Chuaungo, Economist-cum-Under Secretary chuan Sustainable Development Goals awmzia leh tehfung hrang hrangte a sawifiah a. Pu R. Lalfakzuala, Research Officer hnen atangin Sustainable Development Goals pawimawhna leh tihhlawhtlin a nih theih nana hmalak tulte ngaihthlak a ni bawk. Kalkhawmte chu hmasawnna hnathawh tlo, daihrei leh rintlak nei tura hmathlir nei tur leh, khawtlang hmasawnna ngaihtuah chunga hnathawk tur te, SDG tihhlawhtlin kawnga data taima taka la tur leh SDG ranking san theih nana theihtawp chhuah thin turin an chah bawk.

Zawhna leh chhanna hun hman a nih hnuah Pu C. Lalnghakliana, District Research Officer & Member Secretary, District Planning Committee chuan lawmthu sawiin SDG Workshop hi a khar a ni.

Sustainable Development Goals (SDGs) hi kum 2015 a United Nations General Assembly neih tuma member ram 193 ten lungrual taka thuthlung an ziah, khawvel ram hrang hrangte'n hmasawnna ngelnghet an neih theih nana kum 2030 hma ngeia hmasawnna thlen tum chin thiltum 17 te sawina a ni a. Sustainable Development Goals 17 tarlan zingah hian retheihna leh tam tuarna umbo, hriselna, zirna tha leh intluktlanna siam, tui thianghlim leh faina, ei leh bara hmasawnna thlen, sik leh sa danglam chak lutuk tur ven, remna, muanna leh dikna tungding tura hmalak, kan chenna leilung leh a chhunga chengte humhalh bakah tum ram thleng tura thawhhona tha neihte chu a langsar zual an ni.