3893/2024-2025 

Dated Serchhip, the 21^st January, 2025: Vawiin khan Beti Bachao Beti Padhao (BBBP) kum 10 tlinna champhaphak leh January 24 a National Girl Child Day lo thleng tur pualin a khuh hawnna programme chu Serchhip DC Pu Paul L.Khuma hovin Serchhip DC Pisapui Hall ah neih a ni. 

DC Pu Paul L Khuma chuan India rama mipui vantlangte zingah hmeichhe fa aiin mipa fa hlut leh dahsan zawkna thinlung pu an la tam a, hmeichhe fa an pai tih an hriat avanga titla (abort) te an awm thin bakah hriselna, zirna leh ei tur tha pek kawngah pawh mipa naupang aiin hmeichhe naupang ngaihthah an ni fo thin a; chutianga inthliarna a reh theihna turin he programme hi buatsaih thin a ni, a ti. India ramah kum 1991 ah chuan mipa 1000 zelah hmeichhia 927 an awm a, 2011 chhiarpuiah chuan 1000 zelah 940 an awm a, Child Sex Ratio (nau pianghlim atanga kum 6) ah erawh chuan chuan 1991 ah mipa 1000 zelah hmeichhia 945 an awm laiin kum 2011 ah chuan mipa 1000 zelah hmeichhia 914 an awm thu Serchhip DC chuan a sawi a. India ram pumpuiah nau piang sex ratio ah hmeichhia an tlakhniam zel avangin hmeichhe naupangte hlutzia inzirtir thar kan mamawhzia a lang a, sawrkar laipui chuan kum 2015 atang khan chak takin hma a la tan ta a ni, a ti. DC Pu Paul L.Khuma chuan vawiin programme a tel te hlawk taka hun hmang turin a chah a, hmeichhe naupang te dikna chanvo humhimna leh, mipa leh hmeichhe inthliarna a bo theih nan, mi dangte hrilh leh zirtir chhawngtu nih turm turin a fuih a ni.  

Vawiin programme ah hian College level Public Speaking Competition neih a ni a. Heta tithate lawmman hi kharna inkhawm, January 24 (Zirtawpni) a nei turah sem a ni ang. 

Pu James Lalremliana, DPO-in-charge chuan vawiin inkhawm hi a kaihruai a. Gender Specialist Pi V Lalruatsangi chuan BBBP nih phung leh Serchhip District chhunga hma an lo lak tawh dan te sawizauna hun a hmang a. Beti Bachao Beti Padhao leh National Girl Child Day pual hian kalkhawm ten thutiam an sawi rual bawk a ni.