3892/2024-2025

Dated Kolasib the 21st January, 2025: Vawiin khan Kolasib DC office chamber-ah Pu Robert C Lalhmangaiha, Kolasib DC kaihhruaina hnuaiah District Beautification competition chungchang ngaihtuahho a ni a. He hun ahhian UD&PA Department in a buatsaih Mizoram a District hrang hrang cheimawi intihsiakna lo awm tur atan a Kolasib district lo inpuahchah dan leh hmalak dan turte sawiho a ni.

Kolasib DC Pu Robert C Lalhmangaiha chuan UD&PA department in District beautification inelna an buatsaih chu a lawmawm a tih thu sawiin, inelna lo awm tur chu department pakhat mai in a thawh theih a ni lo tih sawiin department hrang hrang leh khawtlang leh tlawmngaipawl te thawhho na a pawimawh takzet dawn a ni, a ti. DC chuan inelna ah lawmman la zinga an tel thei anih phei chuan pawisa fai thahnemtak a kentel dawn avangin district hmasawnna tur hna a thawh theih dawn a, chuvang chuan neitu thinlung pu a theihtawp chhuah tur in kalkhawmte chu a chah a ni.

He hun ah hian Kolasib DUDO, Pi Josephine Zonunsangi chuan District Beautification Competition guidelines te a tarlang a. He inelna atana pawimawh tur nia an rin Kolasib UD&PA Department ina anlo tinzawn  te sawilangin, heng an lo chhawpchhuahte leh thildang pawimawh tur nia rin te vawiin a kalkhawmte hian an sawiho nghal a ni. 

District beautification competition 2025 hi Mizoram pum huap a District cheimawina lam a inelna tur ani dawn a. Hei hian tehfung hrang hrang neiin chung zingah chuan hmasawnna ruhrel(infrastructure) din te, environment siamthat hawi zawng a hmalakna te, khawpui mawi zawk nana hmalak te, sorkar scheme awm mek te nen a thlunzawm te leh mipui a tam thei ang bera tel tura sawm te a tel a. Heng zawng zawng hi DPR siamtur niin chu DPR atangin lawmman dawng thei tur thlanchhuah a ni ang.

Vawiin a District Beautification Committee thutkhawmna ahhian kolasib DC Pu Robert C Lalhmangaiha bakah, Pu David H Lalthangliana kolasib SP,Additional DC kolasib, DUDO Kolasib, PD Kolasib, PHE, School education, District hospital hotute leh Kolasiba MUP, MHIP, YMA aiawh te leh sawmbik mi pawimawhte an tel a ni.