160/2026-2027
Champhai, dated 15th April, 2026: Vawiin chawhma dar 11:00 khan BDO Office, Ruantlang-ah BDO Champhai RD Block leh NABARD-te hmalakna tangkawp kaltlangin, Self Help Group (SHG) member-te eizawnna tihhmasawnna tur 'Mobile Cart' hlanna hun hman a ni. He hlanna inkhawm hi Pi Lalremruati Khawlhring, BMM (Block Mission Manager) chuan a kaihruai a. Dr. Vanlalnunpuii Ralte, BDO Champhai RD Block chuan SHG member pali (4) te hnenah Mobile Cart hi a hlan a ni.
BDO, Dr. Vanlalnunpuii Ralte chuan thu sawiin, hmeichhiate chu hmasawnna kawnga ke pen chhuak tur leh hmasawnna thlentu pawimawh tak an nih thu a sawi a. "Hmeichhiate hian rilru hrisel leh ngaihtuahna dik kan put a, rinawmna nena hma kan lak hian chhungkua leh khawtlangah hmasawnna thlentu kan ni thei a ni," tiin kalkhawmte a fuih a ni.
He Mobile Cart-te hi SHG member-ten an eizawnna kawngah nasa taka an hmanraw tangkai a nih theih nan leh an tharchhuah hrang hrangte awlsam zawk leh thianghlim zawka an zawrh chhuah theih nana ruahman a ni.
Inkhawm programme zawh hian, Mobile Cart-te hi a dawngtu turte awmna hmun, Indo-Myanmar border khua Zokhawthara hman nghal turin vailiam nghal an ni bawk.
