Belgian Ambassador Jan Luykx chu vawiin chawhnu khan Aizawl a lo thleng a. Vawiin vek khan Mizoram Chief Secretary Pu Arvind Ray chu a pisaah a hmu.

Pu Jan Luykx chuan Mizoram a lo zin vawikhatna a nih thu sawiin Belgium nen thawhhona tha tak neia,thian thaa insiam bakah Mizoram tana tangkaina an neih theihna lai a awm em tihte a hmuna rawn zir chianga, sawrkar mi pawimawhte rawn hmuh chu a zin chhan a ni, tih a sawi a. Pu Arvind Ray pawhin Mizoram dinhmun tlangpui te hrilhin eco-tourism lamah te, zirna lamah leh skill development lamah hmabak eng tak Mizoramin a neih thute, ram changkang leh hausa Belgium sawrkar nena inkungkaihna tha nei turin Mizoram chu a inhawn reng thu a sawi a ni.

Belgian Ambassador  hi Commercial Counsellor  pahnih Alexis Bossuyt leh Christophe Van Overstraeten ten an tawiawm a. Vawiin tlai vek khan Planning Secretary Dr. C.Vanlalramsanga chu a office-ah kawmin zanin hian Mizoram Governor chu a chenna in Raj Bhavan-ah an hmu dawn a ni.