Nimin leh vawiin khan Mizoram Legislative Assembly hnuaia Subject Committee-III chuan an Chairman Pu R. Vanlalvena MLA hovin Lawngtlai District-a oil palm chin leh sawngbawl kawnga Agriculture Department (Crop Husbandry) leh Ruchi Soya Company te hma lakna a hmunah kalin an en fiah.

He hunah hian member atangin Pu K. Lalrinthanga MLA leh Pu Lalthanliana MLA te rawn telin, MLA Secretariat atangin Under Secretary Pi Lalnunpuii Renthlei leh Assistant Pu Rammuanpuia te'n an rawn zui a. Agriculture Department atangin Director of Agriculture (Crop Husbandry) Pu J. Lalzamliana, Deputy Director Pu C. Lalthlamuana, Subject Matter Specialist (Oil Palm) Pu B. Ramnunsanga leh District Agriculture Officer Pu J. Rokima leh staff thenkhat te'n an tawiawm bawk a ni.

Subject Committee-III te hian nimin khan Vaseikai hmuna oil palm nursery leh a chinna hmun te an tlawh a. Nghalimlui Community Hall-ah oil palm chingtute nen inkawm hona neih a ni a. He hunah hian oil palm chingtute chuan Subject Committee te hnenah hian an dinhmun report an pe a. Chairman Pu R. Vanlalvena MLA chuan oil palm chingtute chu department mi thiamte ring tawk tur leh an thu sawite zawm turin a fuih a. Director of Agriculture (CH) Pu J. Lalzamliana pawhin Direct Benefit Transfer (DBT) system hman a nih tawh a, pawisa reng reng kut hna thawktute hnena a kal tlang nghal zel tawh avangin hlawhtlinna chu kut hna thawktute kutah a innghat nasa zual tawh hle a ni tiin, an sum dawnte chu rinawm taka a nihna tur taka hmang turin a chah bawk.

Vawiin khan Subject Committee-III te hian Chawngtea Nalbonya oil palm nursery leh a chinna hmun te an tlawh leh a. Oil palm chingtute  nen inkawm hona hun an hmang leh bawk.

Kum 2017-2018 chhunga Lawngtlai District-a oil palm chinna hmun zau zawng chu hectare 398 a ni a. Hma sawn zel tura tan lak tum a ni.

Subject Committee-III te hian naktuk May ni 12, 2018 hian Lawngtlai District an chhuahsan ang.