Nimin tlai khan Belgium Ambassador Pu Jan Luykx chuan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chu a chenna Raj Bhavan-ah hmuin inkawmna hun an hmang a ni.

Governor chuan Pu Jan Luykx chu Mizoram dinhmun leh sawrkar hmalakna hrang hrang te a sawipui a. Himalaya tlangrama cheng mipuite chu thingtlang atangin khawpui lamah eizawnna tha zawk zawngin an pem lut zel thu sawiin, khawpuia hmanrua (resource) kan neih ten min daih dawn loh avangin, urbanisation kawnga sulsutu Belgium ram thiamna leh puihna an mamawh thu a sawi a ni. Aizawl chu smart city-a siam turin traffic management leh mipui himna lama an tawnhriatte an tangkaipui theih a rin thu a sawi a ni.

Pu Jan Luykx chuan Aizawl chu khawpui fai tak a nih thu leh khawpui lian taka awm ang maia inngaih thu a sawi a. Mipuite mikhual laka an that thu sawiin, tourism atan potential a neih that thu a sawi a. Tun aiin hmasawnna ruhrel tihchangtlun theih se khualzinte tlawh duh hmun pawimawh tak a nih theih thu a sawi bawk a ni.

Belgium Ambassador hian hmarchhak biala ramte tlawhchhuahna nei in, Manipur leh Nagaland te a tlawh tawh a. Pu Alexis bossuyt, Commercial Counsellor, FIT leh Christophe Van Overstraeten, Commercial Counsellor, AWEX ten an tawiawm a ni.