Vawiin chawhma khan Synod Hospital Durtlang Auditorium-ah International Nurses Day-2018 hman a ni a. He hunah hian Health Minister Pu Lal Thanzara chu Khuallian niin a hmanpui a. International Nurses Day 2018 thupui chu ‘Nurses: A voice to lead-Health is a human right’ tih a ni.

Khuallian Pu Lal Thanzara chuan nurse-te chu Florence Nightingale anga hna thawk a, a inpek anga inpe thar turin a chah a. Damlo leh anmahni awmpuitu an chhungte chunga tawngkam hman leh biak danin nasa takin damloteah damna leh nat zualna a thlen thei a ni tih hre reng turin kalkhawmte chu a fuih a. Kan tawngkam leh cheziaah midang thlamuantu kan ni ngei ngei tur a ni, a ti a. Mizorama kan nursing school hrang hrang te hi an lar in, Mizoram pawn atang pawhin an rawn pan nasa thin a ni tiin phai lama inentir leh damlo tlawh chang hian damdawiin-a mizo nurse thawk an lo awm chuan a thlamuanthlak thin a ni, a ti a. Nurse-te chu damlohna, natna, beidawnna leh thihna kara thawk reng in nih avangin rilru lam pawh a nghawng lo theilo a ni tiin a eng zawnga thil thlir thiam a, rilru hrisel put tum hram hram tur a ni, a ti a. Mahni inenkawl a, in duat nachang hre turin a chah a. Kan ramah doctor leh nurse indaihlohna a nasat thu sawiin thingtlang hmun kilkhawra Health Sub-Centre-ahte Nurse ten nasa taka tan an lakna chu lawmawm a tih thu a sawi a. MIMER din phalna kan hmuh tawh angin hemi a thawk tur staff nurse 65 leh ward superintendent 31 chu MPSC-in a la fel tawh a ni tiin nikum khan GMN School Thingdawl leh ANM School Lawngtlai chu zirlai 20 ve ve la in bul an tan tawh a ni, a ti bawk.

 Trained Nurses Association of India (TNAI) Mizoram Branch President, Pi Lalremmawii chuan thu sawiin Nurses Day-ah hian inpekna thar nen tan I la theuh ang u, a ti a. Kan thiamnate tibelhchhahin lainatna nen damlote kan enkawl tur a ni tiin thingtlang kilkhawr thlenga thawk thei tura kan inbuatsaih a ngai a ni, a ti a. Nurse hna chu phur leh hlim taka thawk zel turin kalkhawmte chu a fuih bawk a ni.

TNAI Mizoram Branch Programme Committee Chairperson, Pi C. Thankhumi chuan kumin thupui ‘Nurses: A voice to lead-Health is a human right’ tih sawi zauna hun a nei a. TNAI Mizoram Branch Nursing Service Section Chairperson, Pi Lalbiaksangi chuan lawmthu sawina in hun a khar a. Chawhnu lamah programme hi cultural show, quiz leh entertainment dangin a chhunzawm ang. Programme hi TNAI, Mizoram Branch buatsaih niin Nursing hnathawk mekte leh pension tawhte, Nursing college hrang hrang zirlai leh zirtirtute an tel a ni. International Nurses Day hi Florence Nightingale pian champha May Ni 12-a hman thin a ni.