Nikhat awh ‘One day Orientation Training of Medical Officers on National Programme for Prevention and Control Of Deafness (NPPCD)’ chu vawiin January ni 23 hian Directorate of Health Services Conference Hall, Dinthar-ah neih a ni.

National Programme for Prevention and Control of Deafness hi kum 2007 atang khan India ram hmun thenkhatah chuan hman tan a lo ni tawh a. He Programme thatzia hi hmuhin a programme hi tih len belh zel a ni a. Mizoramah pawh nikum August, 2014 atang khan a bul tan niin Mizoram District pathum (3) Aizawl East, Aizawl West leh Lunglei District-ah te tunah hian hman tan a ni.

Vawiina training neihah beng lam Specialist Dr. Thanchungnunga, Dr. R. Lalnuntluanga leh Ms. Lalrinfeli, Audilogist and Speech Pathologist ten District pathum – Aizawl East, Aizawl West leh Lunglei atanga lo kal Specialist 7, Medical Officer 31 - PHC, CHC leh RBSK Mobile Health Team a mi te chu Beng hriselna leh beng lam natna enkawl dan te, Bengdar chungchang te zirtirin inhrilhriat tharna hun an hmang a. Beng na enkawl thatloh avanga bengngawnna lo awm theih dan leh bengngawng enkawl dan te zir ho a ni.

He Programme hian nasa takin hma lak a tum mek a, tunah hian Training chhawng thumna hman mek a ni a. Kumin chhungin training chhawng 7 neih tum a ni a. Nurse, Health Worker, ASHA (Accredited Social Health Activitist) te leh NGO te pawh Training hi pek vek tur an ni a. Health Department a thawkte bakah Primary School Teacher (School Education Department), Anganwadi Worker leh CDPO (Social Welfare) te pawh training la pek tur an ni.

He Programme hnuaiah hian Health Team pathum an awm mek a. Team pakhatah hian Medical Officer, Audiologist, Audiometric Assistant leh Hearing Instructor for Hearing Impaired Children te an awm a. Tunah hian heng team te hi ENT Department, Civil Hospital, Aizawl-ah te, State Referral Hospital, Falkawnah te leh Civil Hospital, Lunglei ah te an awm a. Beng lam hriselna nei thei turin beng lama harsatna nei te chuan heng hmunte hi panna chang hre tur leh heng hmun hnaia awm lo te tan pawh Sub-centre leh PHC hnai berah kal vatna chang kan hre turin NPPCD Cell, Directorate of Health Services chuan mipuite a ngen a ni.

India ramah hian bengngawng kan la tam hle a, tunah hian mi 100 zela 6.3 hi bengchhet/bengngawng niin mithiam ten an chhut a. He Programme in a tum te chu beng natna hrang hrang a hma thei ang bera hmuh chhuah a, enkawl dam hi a ni. Hei hian nasa takin kan rama bengngawnna hi a ti hniam thei dawn a ni.

Beng enkawl fai leh uluk pawimawhna te mipui ten kan hriat hi a pawimawh hle a, beng a kherh reng rengin Doctor emaw Health Centre hnai bera kal vat tura inzirtirna hi he Programme hian a ngai pawimawh hle. Hei bakah hian beng lama harsatna neite tana inenkawlna tha tak an neih theih nan Hospital te tih chang tlun belh hi a tum a ni bawk.