Vawiin khan Mamit Chhimveng Hall-ah Agriculture Department hnuaia NLUP tanpuina dawngtu mi 289 te hnenah 2nd Phase chu Pu VL Robiaka MLA leh ZIDCO Chairman ni bawk chuan a sem.

Pu VL Robiaka chuan Sawrkarin NLUP tanpuina hi a sem satliah mai a ni lova, Zoram hmel tidanglam khawp tura ei leh bara kan indodelh theihna tura mi harsa zawkte dawm chhuahna tur a ni a ti a. Tanpuina dawngtute chu mahni inbum lo tura chahin, taima taka thawk te chuan hlawhtlinna an hmu a, an hmu zel dawn a ni, a ti.

Vawiin a Agriculture Department Mamit District hnuaia NLUP sem chhuah hi 2nd phase a ni a, Leilet(WRC-I 2nd Instalment) ah mi 75 te hnenah Rs. 5,000 theuh, Red Oil Palm(4th Instalment) chingtu mi 184 te hnenah Rs 12,000/- theuh leh Fu(4th Instalment) chingtu mi 30 te hnenah 28,000/- theuh a sem a ni. Vawiina tanpuina pawisa sem zawng zawng hi Rs. 34,23,000/- a ni a, tanpuina dawngtute bank account ah dahluh sak nghal an ni.

He hun hi PU LV Zomuana, District Agriculture Officer chuan a kaihruai a, 2014 chhunga Agriculture Department hmalakna hrang hrangte a lem nen entirin a sawifiah nghal bawk.