Mizoram chuan 11th July, 2019 khan New Delhi a Agriculture Today buatsaih, Agriculture Leadership Conclave-ah Best Horticulture State Award a dawng a. He chawimawina dawn hi vawiin khan Chief Minister Pu Zoramthanga hovin Horticulture Directorate Conference Hall-ah lawmna hun buatsaih a ni. He hunah hian Dr. K. Pachhunga, Vice-Chairman, Bamboo Development Board leh Prof. F. Lalnunmawia, Vice-Chairman, Horticulture Development Board te pawh an tel a ni. Best Horticulture State Award hi thei leh thlai chingtute tana a thawh that avangte leh kum rei lote chhunga horticulture lama hmasawnna duhawm tak tak a neih avangin Mizoram Horticulture Department hnenah hlan a ni.  

Chief Minister Pu Zoramthanga chuan Mizoramin Best Horticulture State Award a dawng chu Horticulture Department thawktute thawhrim vang a nih mai bakah sawrkar hmasaa Chief Minister leh Horticulture Minister te hmalakna rah a nih thu a sawi. Horticulture Department chu Mizoramin intodelh tura a in buatsaihnaah a pawimawh chhoh zel tur sawiin Chief Minister chuan Mizoram chu ei leh bara intodelh  turin assets a neih that thu leh, a bul tan nan chuan ei tur chaw a tan a pawimawh thu a sawi a. Chumi atan chuan agriculture leh horticulture department te pawimawhna sawiin, horticulture department phei chu Mizoram economy siam danglama  tur hmalakna Bamboo Development Scheme kalpuitu tur an nih avangin thawktute chu tha thlah lova an thiamna leh theihna te tangkai taka hmang chhunzawm zel turin a chah a. Sawrkar kalphung turah hmalakna hrang hrangte chu Board hrang hrang hnuaia society system a kalpui a nih tur thu sawiin Chief Minister chuan hmasawnna tuam kim leh kal chak tak nei tur chuan a hnuai lama thawktute an inthlunzawm that a pawimawh thu a sawi. Mizoram chu state entawntlak a chhuah turin Pathianin a chhunga chengte kutah a dah a ni tiin Pu Zoramthanga chuan hmasawnna kawng engkimah a hmahruaitu kan ni tur a ni, a ti.

Dr. K. Pachhunga, Vice-Chairman, Bamboo Development Board pawhin thu sawiin, State Horticulture Award chuan Horticulture department thawktuten work culture tha tak an nei tih a lantir a ni, a ti a. An zavaia a te ber atanga a lian ber thawhrimna rah a nih thu a sawi. Dr. K. Pachhunga chuan Mizote chu talent nei ngah tak, hnam themthiam, a ngaihna hria kan ni tiin, inphochhuak thei tur chuan inrintawkna leh teirei peihna kan mawmawh thu a sawi a. Sports lamah te hming kan chher tawhin langsar tak tak thangthar chhuanzawm tak tak an chhuak zel a, tunah pawh horticulture-ah rahbi kan siam mek hi a lawmawm hle a ni, a ti. Bamboo development lama ngaihtuahna sen chu pawimawh a tih thu a sawi bawkin, khawvelin mau leh rua tangkaina te hmuchhuakin a ngaihsan thu a tarlang a: Bamboo Development Vice Chairman chuan khawtlang leh state chawikang turin rua(bamboo) a that tawk thu a sawi.

Prof. F. Lalnunmawia, Vice-Chairman, Horticulture Development Board chuan Horticulture department te thawhrimna zarah Mizoramin award a dawng thei chu lawmawm tiin, sang leh zual zawk thlenna tura rahbi pawimawh a nih a beisei thu a sawi. Horticulture Department thawktute chu zau leh zuala thingtlang kuthnathawktute an department in a dawmkan theih dan tur te, horticulture a tui thalai lehkhathiamte tan eizawnna ngelnghet nei thei tura kawng kawhhmuh dan tur te ngaihtuah turin a sawm a. Prof. F. Lalnunmawia chuan thalaite zinga capacity building pek a, skill development lamah nasa taka hmalak pawimawh a tih thu a sawi bawk.

Horticulture Department Director Dr. Elizabeth Saipari chuan state in award a dawn chhan te sawiin, chawimawina hi mimal award nilovin thawktute zawng zawng thawhchhuah a nih thu a sawi a. Kuthnathawktute thahnemngaihna leh department a thawktu te zawng zawng ten hah taka an thawh avanga Mizoramin he award hi a dawng thei an ni, a ti. 

Agriculture Today hi India ram agriculture hmasawnna pholanna leh tihhmasawnna atana mithiamten kawng hrang hranga zirchianna an neih te puanzarna magazine a ni a. India ram mipui eizawnna lian ber chu agriculture leh a kaihhnawihte a nih avangin kawng hrang hranga hlawk leh tha zawka hmalakna siamtute leh thawkthate chawimawi an nih a, agriculture in hma a lo sawn zel theih nan Agriculture Today Group chuan Agriculture Leadership Conclave hi an buatsaih thin a. Kumin Agriculture Leadership Conclave & Leadership Award 2019 hi a vawi kua na niin, award dawng tur thlangtute hi National Jury of Agriculture Leadership Award-2019 niin an chairman Kerala Governor Pu P. Sathasivam kaihhruaina hnuaiah Taj Palace, New Delhi ah July ni 11 khan neih a ni a. Award category hrang 20 zinga "Best Horticulture State" award chu Mizoramin a dawng a, Union Minister for Agriculture and Farmers’ Welfare Shri Narendra Singh Tamar chuan lawmman hi a hlan a ni.

Vawiin programme hi Pu Sangdingliana, Secretary, Horticulture Department chuan kaihruaiin, Pu Vanlalnuntluanga Renthlei, DHO Aizawl hnen atangin thusawi ngaihthlak a ni bawk a, Pu H. Manthianga, Joint Director chuan lawmthu sawiin hun a khar a ni.

India ram hmun danga la awm ngai lo Dragonfruit chu lian tham takin Mizoram ah kal pui mek a ni a. Tun dinhmunah Mizoram hi India ramah lian tham taka Dragonfruit ching hmasa ber a ni a. Khawvel sik leh sa danglam chho zel (climate change) avangte, khawvel boruak lum chho zel (global warming) avangte leh India ram chhunga Dragonfruit demand hi a that em avang te in he thei, cactus chi khat, sik leh sa inthlak danglam tuar thei tak hi chin uar chhoh deuh deuh zel a ni a. Thailand leh Vietnam atangtein Dragonfruit hi lak luh a ni a, a man a toin a thlum lo zawk bawk. Hetiang market demand nei tha bawk si Dragonfruit hi farmer te dinhmun chawikan nana thil tha taka ngaih a ni. Pangpar chi hrang hrang chin kawngah nasa taka hma lak reng a ni a, tualchhung mamawh hmun tam takah phuhruk a nih tawh mai piah lamah Anthurium bik phei chu state dangah thawn chhuah reng a a ni tawh nghe nghe.

Government of India thil tum pawimawh Doubling Farmers’ Income by 2022 Programme hnuaiah kuthnathawktute dinhmun nasa taka chawikan tum mek a mi a. He programme tihhlawhtlinna hmanraw pakhat atan off-season vegetable cultivation hnuaiah Fur Zikhlum leh Tomato uar taka kalpui reng a ni a, kut hnathawktuten hlawkna nasa tak an tel chho mek zel tawh a ni. Farmers ten horticulture science lama thiamna thar an puakchhuah theih nan leh thlai phun tur tha bik mipuiten kan ram chhung ngei atanga an neih theih nan Centre of Excellence hmun hrang hrangah din a ni a, heng centre-te hi Mizoram chhunga farmer-te mai bakah state pawn atanga farmers leh officials ten thil thar zir nan leh hriat nan an tlawh fo thin. Hei bakah hian B.Sc Horti final year zirlai ten internship tih nan an hmang bawk thin. Kan thei leh thlai thar chhuahte mumal zawk leh him zawka rei tak dah that an nih theih nan Cold Chain System kal pui mek a ni bawk a, hmun hrangah hrangah cold storage (Thlaithar vawn thatna) din mek a bawk.

Heng hmalakna hrang hrangte hi kuthnathawktute hmasawnan an pawimawh zia leh ei Ieh bar kawngah nasa takin a pui tih hriaiin Best Horticulture State Award hi Mizoram Horticulture Department hnenah a hlan a ni.