684/2023-2024

June ni 5, 2023: Vawiin chawhnu dar 1:00 pm khan Aizawl Municipal Corporation Auditorium-ah Ward tina Reduce, Reuse and Recycle Centre (RRR Centre) kalpui tha te hnenah Sumfai lawmman leh chawimawina thuziak hlan an ni.

Meri Life, Mera Swachh Shehar Campaign, 2023 (Ka Chenna, Ka khawpui Faina atana Beihpui, 2023) hnuaiah May ni 20, 2023 khan Municipal Ward tinah RRR Centre hawn a ni a. Heng RRR Centre-ah te hian thuamhnaw hlui, pheikhawk hlui, lehkhabu hlui, plastic bottle ruak, naupang toys hlui  te lakkhawm a ni. Heng thilhlui lakkhawmte hi a tangkaina dang atana hmannawn leh tur a ni ang.

May ni 3-5, 2023 inkar chhungin RRR Centre kalpui tha endikna neih a ni a, May ni 5, 2023 chawhnu dar 1:00 pm hian Aizawl Municipal Corporation Auditorium-ah RRR Centre kalpui thate hnenah sumfai lawmman leh chawimawina thuziak hlan an ni. Aizawl Municipal Corporation huamchhungah hian RRR Centre 19 awmin, chung zinga RRR Centre kalpui tha ber Ward-8 RRR Centre (Armed Veng South MHIP House) hnenah hlan niin, Ward-10 (Zotlang LC House) leh Ward-15 (Bungkawn YMA In) hnenah pahnihna leh pathumna lawmman hlan a ni a. Ward 2 RRR Centre (Chaltlang LC House) leh Ward 19 RRR Centre (Tlangnuam Vengthar MHIP House) hnenah consolation prize pek an ni bawk.

RRR Centre kalpui thate hnena lawmman semna hun hi Joint Municipal Commissioner Pu Lalremruata Kullai in a kaihruai a ni. Municipal Commissioner Er. Lalhriatpuia, Aizawl Mayor Pu Lalrinenga Sailo leh State Mission Director, SBM (U), Pu H. Lianzela ten thu an sawi a ni.

RRR Centre hawn ni atanga vawiin ni thlenga RRR Centre-a thilhlui lakkhawm zat chu hetiang hi a ni. Plastic 471.3 kg, lehkhabu hlui 7526, thuamhnaw hlui 1782 leh pheikhawk hlui bun 888 a ni.