685/2023-2024

Aizawl, 5th June 2023: Vawiin khan Chief Minister Pu Zoramthanga chuan Sihphir leh Sihphir Venghlun huamchhunga Agriculture Department hmalakna a siam kilometer 16.58 a thui Agriculture Link Road 8 bakah tuikhuah 39 te chu a hawng a. He hunah hian Agriculture Minister Pu C. Lalrinsanga chuan Chief Minister hi a tawiawm a ni.

Hawnna inkhawm Rohrenga Hall, Sihphira neihah hian khuallian Pu Zoramthanga chuan thu sawiin kuthnathawktute tana hmasawnna hnathawh hrang hrang hawn theih a ni ta chu a lawmawm tak zet a ni, a ti a. Kuthnathawktute hmasawnna tura Agriculture Minister leh a thawhpuite hmalakna chu fakawm a tih thu a sawi bawk. Mizoram chu ram leilung tha, thlai engkim that duhna ram a ni, Chief Minister chuan a ti a. An thlai thar phurhchhuahna kawnga kuthnathawktute harsatna tawh chu sawrkarin a hriatpui thu leh awlsam zawka thlai thar an phurhchhuah theihna tur kawng siam chu sawrkarin a ngaipawimawh a, hma a la zel dawn tih a sawi bawk.

Chief Minister chuan Covid Hripui, Vawk hri leng, ramri buai leh thenawm ram buai nghawng thil hrang hrang avangin sawrkarin harsatna tam tak a tawk a, chhiah a hmuh tur zat pawh a hmu thei lo a ni, a ti a. Chutihrualin, heng harsatna karah pawh mipui mamawh ei leh barah harsatna tawk lo a sawrkar a kal thei leh hmasawnna ruhrel din a ni zel chu lawmawm a tih thu a sawi bawk a ni.

Agriculture Minister Pu C. Lalrinsanga pawhin he hunah hian thu sawiin kuthnathawktute puala din hmasawnna ruhrel pawimawh tak tak te hawn theih a ni chu a lawmawm hle a ni, a ti a. A department chan Agriculture leh Irrigation & Water Resources hnuaia hmalakna hrang hrang te tarlangin Minister chuan Sihphir khuaah PMKSY ‘Har Khet Ko Pani’ scheme hmangin tuizem mi 20 hnenah pek a nih te, RKVY hnuaiah Sihphir leh Tuirialah Solar Cold Storage din a nih tur thu te, PM KUSUM hnuaiah kuthnathawktu ten tui pump-na khawl an neih thuai tur thu te a tarlang a. Tuihna humhalhna kawnga hmalakna kal zelah Sihphir Dakla lui bakah Dialdawk lui te chu Brahmaputra Board hnuaiah zirchian a ni dawn tih Minister hian tarlangin kuthnathawktu kalkhawmte chu Sihphir Neihbawi tlanga OP-12 Biofertilizer buatsaih chu hmang tangkai turin a fuih a ni.

Mizoram chhim lama thlawhtheihna tumhmun din tumna kal zel chanchin pawh tarlangin Pu C.Lalrinsanga chuan Lunglei Vuakzawl hmunah Airport din a nih ngei theih nan sawrkarin hma a la mek a ni, a ti a. UDAN 5.0 hnuaia telh ngei a nih theih nan nilaini (8th May 2023) hian Aerial Survey neih tum a nih thu a sawi.

Vawiinah hian scheme hrang hrang Special Assistance to State for Capital Expenditure ( SASCE), NABARD Rural Infrastructure Development Fund (RIDF) bakah Rashtriya Krishi Vikas Yojana - Remunerative Approaches for Agriculture and Allied Sectors Rejuvenation (RKVY-RAFTAAR) hnuaia Agriculture Link Road laih thar pathum kilometer 7 a sei leh kawng awmsa 5 ah te PCC flooring km 9.58 a sei cheng nuai 547.98 senga siam chu hawn a ni a. Hei bakah hian Pradhan Mantri Krishi Sinchayee Yojana ( PMKSY) hnuaiah tuikhuah 39 - Secondary Structure 1 leh Water Harvesting Structure 38 cheng nuai 36.20 senga sak te chu hawn a ni.

Link Road leh tuikhuah hawnna inkhawm hi Agriculture Department Secretary Pu C. Lalrosanga chuan a kaihruai a,Director Pu James Lalsiamliana chuan technical report a pe a. Sihphir khawtlang hruaitute hnen atangin thusawi ngaihthlak a ni bawk.