686/2023-2024

Champhai, the 6th June, 2023: Ruihhlo leh a kaihhnawih hrang hrang laka India ram a fihlim theihna tura sawrkar laipuia Ministry of Social Justice & Empowerment leh Mizoram State Social Defence & Rehabilitation Board-te tangkawp hnuaia National Action Plan for Drug Demand Reduction (NAPDDR) hmalakna, 'Nasha Mukh Bharat- Drug Free India Campaign' kalpuitu District Level Nasha Mukt Bharat Abhiyaan Committee, Undivided Champhai District chu vawiin chawhma dar 11 khan Champhai District Bawrhsap Pu James Lalrinchhana, Chairman, District Level Nasha Mukt Bharat Abhiyaan hovin DC Conference Hall-ah an thukhawm.

District Bawrhsap Pu James Lalrinchhana chuan Champhai District leh a chhunga cheng thalai tam tak run mektu, ruihhlo leh a kaihhnawih do kawnga hmalaknate inhrilhhriatna leh inhriatpawhtawnna hun a zing thei ang bera neih chuan ruihhlo do kawngah awmze thui tak a nei a ni, a ti a. Chak zawka hmalakna tur fund dawn a la ni rih lo chung pawha India ram District zinga NASHA Mukh Bharat Abhiyaan kalpui tha berte zinga Champhai District a tel chu fakawm a tih thu a sawi bawk.

Member Secretary, Nasha Mukt Bharat Abhiyaan (NMBA), Champhai District Pi P.B. Liansangpuii, Coordinator, Mizoram Social Defence & Rehabilitation Board (MSD&RB), Social Welfare & Tribal Affairs Department hnen atangin report ngaihthlak a ni a. September 2023 atanga October 2024 chhunga hmakak dan tur Action Plan duan chu pharhin a sawifiah nghal bawk.

Meeting hmasa leh vawiin inkara hmalak dan leh hmachhawpte tarlan a nih dan chuan May ni 24, 2023 khan Tlangsamah NASHA Mukh Bharat Abhiyaan Health Camp buatsaih niin, ruihhlo ngai mi 30 te an inentir a. Excise & Narcotics Department Champhai chuan sawmna an dawn angin April thla tawp atang khan PCI Champhai Vengthlang Pastor bial chhunga naupang chawhnu Sunday School-ahte ruihhlo chungchang awareness campaign an nei a, vawiin ni thlengin Vengthlang North, Vengthlang leh Electric Vengahte an nei tawh a, Champhai Venglaiah neih hmabak a ni. Heng bakah hian tun thla chhungin zirna in leh YMA Branch-ahte ruihhlo chungchang inzirtirna buatsaih tum niin, Govt. Champhai College Anti Drugs Cell nen thawhdunna tur chungchang an ngaihtuah mek bawk a ni.

He hunah hian ruihhlo do kawnga inzirtirna zau zawk kalpui dan turte, thalai leh khawtlang nuna ruihhloin bu a khuar thuk tawh dante sawiho a ni a. Ruihhlo ti thar an pung zel leh kum la tlinglo ruihhlo khawih tharte chhanchhuah leh enkawl kawnga pawimawhte tarlan niin, hemi kawnga hmalak tawh dan leh hmachhawpte YMA, MHIP leh Home hotute atangin ngaihthlak a ni a. Naupang kum tlinglo, a bik taka enkawlna pek ngaite chu ngaihpawimawh zual a tul thu tarlan niin, ngun taka zirchianna neih hmasak ni se an ti a. Nu leh pate mawhphurhna leh an hnena zirtirna pek a tul ziate pawh ngaihthlak a ni bawk a. Ruihhlo ngaite enkawlna hmun Home hrang hrangte kalphung leh inenkawla kawnga hmasawn ngaihna laite sawiho niin, June thla chhungin Champhai khawpui chhunga ruihhlo ngaite enkawlna Home 6 te tlawhchhuaha zirchianna neih ni se an ti a, Home-a thawktute intuaitharna atan training buatsaih turin rawtna siam tha an ti a. Ruihhlo hman sual leh tawlh ruk dona ni 'International Day Against Drug Abuse and Illicit Trafficking' June ni 26, 2023 a hman dan tur leh he ni puala Talk Show buatsaih dan turte sawiho a ni bawk a. Heng bakah hian Ruihhlo do kawnga Line Department hrang hrangte hmalaknate ngaihthlak a ni bawk.

Nasha Mukh Bharat Abhiyaan- Drug Free India Campaign hnuaiah hian India rama District 272 ahte ruihhlo do hmalakna kalpui hmasak a ni a. Nikum August thla khan District 100 dang telh belh leh a ni a, tun dinhmunah District 372 ah kalpui mek a ni. Aizawl, Kolasib leh Champhai District-te chu Mizoram atanga he campaign kalpuinate an ni a; Narcotics Control Bureau (NCB) leh Ministry of Social Justice & Empowerment kaltlanga National Survey neihin drug hluarna District nia a tarlan zulzuia thlante an ni.