687/2023-2024

Kolasib dated 6th June 2023: Vawiin khan Bairabi North YMA Hall-ah Mizo Zirlai Pawl, Sub-Headquarters, Bairabi buatsaih 'Zirlai Tiṭha Chawimawina' hun chu Pu K.Lalrinliana, Minister, Food, Civil Supplies & Consumer Affairs Department changtu chuan khuallian niin a hman pui a. Pu Ricky Zorinsanga, Vice President, MZP Sub-Hqrs, Bairabi chuan hun kaihruaiin Bairabi khaw chhung a High School leh Higher Secondary School zirlaite he hun ah hian an tel a ni.

Minister Pu K.Lalrinliana chuan High School Leaving Certificate leh Higher Secondary School Leaving Certificate Exam-a hlawtlinna changte lawmpuina leh chawimawina hun buatsaih a ni ṭhin chu lawmawm a tih thu leh hetianga hmalakna hian zirlaite ah phurna leh chona nasa zawk a siam phah ngei a beisei thu a sawi a. Eng hna pawh thawk dawn ila, zirna lam a thiamna nei te chu hlawhtlinna in a zui ṭhin thu a sawi. Minister chuan Exam-a hlawtlinna chan piah lam ah thiamna ziktluak, chhawr tlak leh ṭangkai zir chhuah a ṭul thu a sawi a, ram leh hnam tihhmasawnna leh intodelhna kawng a thil ṭangkai zirchhuah tum turin a fuih bawk a ni. Pu K.Lalrinliana chuan khawvel ah inbiak pawhna leh inkalpawhna lam ah hmasawnna nasa tak a awm tawh avangin eizawnna dap kawngah te, sumdawnna kawngah te leh thil ṭul hrang hrang avanga ramri pel a fehchhuah a ṭul fo ṭhin thu a tarlang a. Hemi a nih avang hian ram leh hnam changkang zawkte anga thiamna leh changkanna um phak ve tur chuan ṭawng dang kan thiam tel a pawimawh thu leh zirna inah te ṭawng dang zir thiam kawng a ṭan lak a ṭul thu a sawi.

Pu Sanghmingthanga, Treasurer, MZP General Headquarter chuan hmun hrang hranga zohnahthlak insuihkhawmna leh harsatna leh buaina avanga Mizoram rawn bel te tuamhlawmna kawng a Mizoram sawrkar hmalakna ah lawmthu a sawi a. Zirna kawng kan zawhna ah taimakna leh tumruhna neih tel a pawimawh thu leh mithiamte rawn chung a thil tum mumal tak neih a pawimawh thu Pu Sanghmingthanga chuan a sawi a, Social media-a hun khawh ral tam lo turin leh heng changkanna te hi zirna a hmasawn pui nana hmang turin a chah bawk a ni.

Pu Lalngilneia, President, MZP, Sub-Hqrs chuan ram leh hnam tan a zirlaiten an tih theih ropui ber chu an zirna a theihtawp an chhuahna hi a nih thu a sawi a, hnam hmangaihna leh tih hmasawn duhna thinlungpu chung a zirna kalpui turin a chah. Bairabi chu ramri dep a awm a nih angin ralmuanna leh zalenna ṭha tak a awm zel theih nan Sub-Divisional Office (Civil) thuthmun siam thuai an beisei thu a sawi bawk a ni.

Bairabia Zirlai tiṭha chawimawina hun ah hian Pu Lallawmkima, Secretary, MZP Sub-Hqrs, Bairabi chuan report a pe a, zirlaite atangin hnam lam leh zai te entir niin Pu Albert Lalchhanhima, Member, Executive Committee-in kalkhawmte lawmna thu a sawi a ni.

Attachment

  • Loading attachment...