688/2023-2024

June ni 6, 2023: Chief Minister Pu Zoramthanga chuan vawiin khan Hnahthial ah kalin, Deputy Commissioner office Complex sak hna thawh mek leh PWD Complex a circuit house sakna ruahman te a hmunah tlawhin a enfiah.

Hnahthial PWD IB ah Chief Minister hmuahna inkhawmah Pu Zoramthanga chuan Hnahthial khawpui chu district headquarter entawntlak taka siam tum a nih thu a sawi. District thar puan a nih hnu ah sawrkar chuan DC office dinna tur district thar pathum tan Rs. 10 crores theuh sum dah a nih thu leh, theihtawp a harsatna hrang hrang kara hma lak a nih zel thu a sawi a. Heng district thar pathum a hmalakna te a enpui dan leh a daihzai zawnga DC hmunhma chu office pakhat aia tam te'n an hman tangkai tura ruahman a tul thu te a sawi a. Khawtlang mipui te pawhin thahnemngai taka na khua leh district hmasawnna turah an lo tawiawm zel a pawimawh thu a sawi.

Chief Minister chuan ram changkang leh upa tak tak, kum za tél hmasawnna lo kalpui tawhna te anga kan ram siam ve tur chuan kum hnih khat chauh a tawk loh thu leh, ram hma kan sawn tir theih dan tur hmathlir (vision) thui tak nen erawh chuan thahnemngai taka beihin ram entawntlakah kan la siam theih thu a sawi a. Chu hamthlir tihlawhtling tur chuan tunah pawh theitawp chhuah a hma lak zel a nih thu a sawi. Chief Minister chuan ram hmasawnna atan a ram neitu te chu a enkawltu kan nih a pawimawh thu a sawi a. Hnam thinlung put hi kan ramin a mamawh a ni tiin ram siamtha tur chuan ram mi leh sa bak kan awmloh avangin ram mipuite chu ram hmangaihna nen a thawkho zel a pawimawh thu a sawi.

PWD engineer leh architect te nen circuit house sakna ruahman hmunhma enfiah nghal a ni a. Chief Minister hian DC office complex ah thing a phun bawk a. DC office a thawktute nen inkawmna hun a hmang bawk. DC Complex ah hian DC office bakah Revenue leh ICT te an awm a. A bulah UD&PA office awm bawkin, a bulhnai sawrkar ramah department dang office sak tura ruahman zel a ni bawk.

Hnahthial DC Pu R. Lalremsanga hovin SP Pu Vineet Kumar bakah district office hrang hrang hotute leh khawtlang leh tlawmngai pawh hruaitute'n Chief Minister hi an dawngsawng a.