689/2023-2024

Aizawl 6th June 2023: Sports & Youth Services Minister, Pu Robert Romawia Royte, Aizawl East-II bialtu ni bawk chuan vawiin khan a bial chhung atanga High School Leaving Certificate (HSLC) leh Higher Secondary School Leaving Certificate (HSSLC) Exam-a hlawhtlinna changte lawmpuina chu Dawrpui Multipurpose Hall-ah a buatsaihsak a, Pu Lalsangliana, Director, School Education Department-chu khualzahawm a ni.

Khuallian chuan thu sawiin hlawhtlinna chang zirlaite chhuanawm a tih thu leh hlawhtlinna chang zo ta lo te pawh beidawng mai lo va nasa zawka zir zel turin a chah a. Zirlaite hi hnam rohlu, Zoram nghahfak, nakina Mizoram kaihhruaitu tur te an ni tih sawiin kawng engkimah fimkhur tur leh taima taka an zirlaite zir zel turin a fuih a ni.

Sports Minister chuan ‘a bul tan that chu a zahve zo ang’ tih hi zirlai ten a taka nunpui a hun hle tawh a ni, a ti a. Matric pass hian nun kawng pengthuam pawimawh takah mihring a hlangkai tiin, eng kawng nge an zawh zel dawn tih thlang thei dinhmunah an awm tih inhria a ngaihtuahna fim tak hmang turin a chah a. Class 12 pass te pawh College lamah nun thar zir turin an kai dawn a ni, a ti a. Bul tan that chu a zahve zo a nih ang takin tha taka bul tan turin zirlaite chu a fuih nghal a ni. Engkim tawpna hi bul tan thar lehna a ni fo tih zirlai ten an hriat a pawimawh tih sawiin Minister chuan a tawp thleng thei turin thawhrimna nen nun kawng chhiar a, hlawhtlinna chang theuh turin a duhsakna a hlan nghal a ni. ‘Vawiin hian nun thar in nei a, rim taka in beih chuan hlawhtlinna ropui tak in nei thei dawn a ni’ a ti a. Talent neih ringawt hi thawhrimna tel lo chuan hlawhtlinna a ni lo a, mi tihdanphung bak kal pela thawk thin te chuan hlawhtlinna an chang thin tiin talent leh thawhrimna chu neih kawp a pawimawh hle a ni, a ti bawk.

Social Media hman danah Mizo te inzirthar kan ngai hle ni a a hriat thu sawiin Pu Robert Romawia Royte ICT Minister ni bawk chuan thudik lo leh a chhe zawng, mi rilru tina thei zawnga thu post leh thehdarh chu bansan a hun tawh takzet a ni, a ti. Zirlaite pawh puitling kawng zawh mek an nih ang takin Social Media hman danah fimkhur turin a chah a, mimal leh vantlang rilru tina thei zawnga thu thehdarh lo turin a fuih bawk. Thudik pawh ni se, mi rilru tina thei zawng a nih chuan Social media a thehdarh lo hram turin Minister hian kalkhawmte a chah bawk. IT Act leh Cyber Crime chungchangah zirtirna tha a ngaih hle thu sawiin sawrkar pawhin he lamah hian hma a lak thu tarlangin inzirtirna pawh kalpui mek zel a nih thu Minister hian a sawi bawk.

Khualzahawm Pu Lalsangliana, Director, School Education pawhin thu sawiin zirlaite hmakhua ngai a bialtu MLA hmalakna chu a fakawm hle a ni, a ti a. School Education Department hmalak theih bak piahlamah bialtu MLA in nasa takin zirna chawisan a nih theih nan hma a la thin tih a takin hmuh theihin a awm a ni tih a sawi. Hei hi a chhuanawm hle a ni tiin Education Department aiawhin Bialtu MLA hnenah hian lawmthu a hrilh nghal a, hun lo kal zel turah pawh zirna chawisan kawnga theihtawp chhuah pui zel turin a ngen bawk.

Pu H. Zothansanga, PS to Minister chuan report pein Aizawl East II bial chhunga zirna kaihhnawih – HSLC & HSSLC pass lawmpuina, zirna in thawmthatna leh tihchangtlunna, zirtirtu leh thawktu rawihna bakah sum lama harsa te tanpuina turin MLA Fund (2019-2023) atangin cheng 64,24,500 lai hman tawh a ni, a ti a. Aizawl East II chhungah hian High School pariat awmin, HSLC Examination 2023 ah chawhrualin za zela 92 an pass a. School pariat zinga pathum -Little Kingdom School, Chhinga Veng, Nazareth English School, Chhinga Veng, KD High School, Saron Veng ten za ah za an pass a ni. Higher Secondary School pali awm te pass percentage chu za zelah 84.4 niin, Nazareth English HSS, Chhinga Veng chu za a za pass awmchhun a ni tih a tarlang a. HSSLC Arts Stream a Mizoram puma pahnihna hauhtu leh Public Administration a subject topper ni bawk Lalawmpuii, Armed Veng South; Arts stream a parukna Mira Sairinmawii, Dawrpui leh R.Lallawmsanga, Saron Veng te chu he bial atanga top ten a lang te niin, F.Lalthanmawia, Chite Veng chu Geology subject-ah topper a ni tih a tarlang.

Vawiin zirlaite lawmpuina ah hian HSLC leh HSSLC a top ten te hnenah Laptop, Subject topper hnenah smart phone, Distinction a pass te hnenah pawisa fai cheng 5000 leh hlawhtlinna chang zawng zawng te hnenah lawmpuina thilpek tha tak hlan a ni. Aizawl East II chhunga YMA Branch paruk te hnenah ruihhlo dona leh zirna chawikanna turin MLA Fund atangin cheng nuai 1 theuh he hunah hian pek an ni bawk.