Vawiin khan Chanmari YMA Hall-ah Directorate of Accounts & Treasuries in hna an thawh that vanga chawimawina lawmman (Award) an dawn lawmna Pu Lalsawta Finance Minister hovin hman a ni.
National Pension System (NPS) enkawlna kawngah Directorate of Accounts & Treasuries, Mizoram in Subscriber nei tha ber lawmman an dawng chu an chhuanawm in he Department a thawkte chauh ni lo, Mizoram mipui tan pawh thu lawmawm a nih thu khuallian Pu Lalsawta chuan a sawi a. India ram State changkang tam tak kara helai Mizoram, Internet leh kawng hrang hranga harsatna neiin hetiang – National Pension System (NPS) enkawlna kawnga Subscriber Record nei tha ber a ni thei hi a lawmawm tak zet thu a sawi.
Hetiang hna NPS chungchang, mihring leh an chungchang chhinchhiah kimna hi uluk leh fimkhur ngai a nih bakah taimak a ngaiin thawh char char chi a ni bawk nen, thawktu te an fakawm tak zet a ni tiin, Finance Minister chuan Subscriber mimal tinte chungchang chhinchhiahna Data ah hian an Mobile Phone Number te, an Bank Account Number leh Nomination te an dah kim vek thei hi an fakawm a, Finance Department leh Mizoram a chawimawi hi an chhuanawm takzet a ni, a ti.
Sorkar hnathawk te hi ramin a thawh tur zawng zawng khawihtu, a bul atanga a ler thlenga khawih leh hrechhuaktu vek an nih thu Pu Lalsawta chuan sawiin Sorkar leh Politician leh ram mipui te pawhin an lo mawipui ve thin a ni a ti a. Thawktu ten Policy leh Programme a neih te tha taka an hlenchhuah zel chuan ram hian din chhuah ni hi a hlat dawn lo a ni tiin, Ram leh Hnam tan tluang taka thawk zel turin duhsakna a hlan nghal a ni.
NPS hi ni 1.1.2004 leh a hnu lama sawrkar hna a ngheta thawk tharte tan hman tan daih tawh kha a niin Mizoramah chuan ni 1.9.2010 leh a hnu lama sawrkar hnathawk nghet a lakte tan a hmang tan ve a, tunah hian Mizoram-ah NPS zawmtu mi 5262 an awm tawh a ni.
State hrang hrangte hi Category 3 ah then a ni a, hetiang in :
Category I : State Subscriber 1,50,000 nei chin
Category II : State Subscriber 50,001 – 1,50,000 nei chin
Category III : State Subscriber 50,000 nei chin
Keini state in award a dawn hi Category III hi a ni a. Ni 19.12.2016 khan New Delhi ah dawn a niin dawn nachhan ber phei chu subscriber te data ah an mobile No, bank account No leh Nomination (Rokhawmtu) dah vek vang a ni nghe nghe. Hetah hian Mizoram chuan 100% a tha in a dah a ni.
Vawiin lawmna programme hi Pi L.N. Tochhawng, Principal Secretary, Finance Department in a kaihruai a. Pu R. Lalbiakthanga, Chief Controller of Accounts in report pawimawh sawiin lawmman dawn te en theih turin a phochhuak a, Pi Esther Leihang, Asst. Director, (NPS) in power point presentation hmangin National Pension System kalphung a sawifiah a. Pu Lalmalsawma, Addl. Secretary, Finance Department in lawmthu sawiin hun a khar a ni.
