Vawiin hian Serchhip khaw chhunga Health Worker, ASHA worker leh Anganwadi worker te hnenah Beti Bachao Beti Padhao (BBBP) Serchhip District hmalakna leh a thiltum te inhrilhhriatna hun DC Conference Hall Serchhip ah buatsaih a ni.

Pi Lalsiampuii, District Child Protection Officer chuan inlawmna thu sawiin, training buatsaih anih chhante a sawifiah a. Fanu thar te lo lawma, lo venhima, an zir puitlin ngei theih nana ram mipuite zirtirnan BBBP hi duan a ni, a ti a. Serchhipah pawh kalpui mek niin District Task Force chuan district chhunga village council te, tlawmngai pawl hrang hrang te, kohhran hruaitute leh khawtlanga pawl hrang hrangte hnenah BBBP hrilhhriatna neih ni se tiin hmalakna tur a duang a. Chu ruahmanna ang chuan vawiinah pawh hian hriselna lama khawtlang tana thawktute hnenah BBBP chungchang inhrilhhriatna hun hi buatsaih a ni, a ti.

Nl. VL Remruatpuii, District Coordinator, Mahila Shakti Kendra chuan BBBP chungchang sawifiahin, Beti Bachao Beti Padhao hi India sawrkar Flagship Programme, Ministry of Women & Child Development in a kalpui mek a ni a. A awmzia chu fanu chu venghim la, zir puitlin tir rawh tihna a ni. India ramah fanu te hian fapate aia duh loh zawk nih an lo hlawh tawh thin avang te, India ram mipui pun chhoh zel danah hmeichhiate punna chu rampum huapa mipate punna aia a hniam thin avangin, hmeichhiate humhima, an lo puna, mipate tih ang leh nih ang te hi an ni thei vek a ni tih lan tir leh India ramah hian mipa leh hmeichhiate hi kawng engkimah an intluk tlang vek a ni, tih hi nasa zawka inzirtir a tul nia hriat a nih avangin Fanu te chu venghima, zirtir puitlin ngei a tulzia puanzara inzirtirnan - Beti Bachao Beti Padhao hi din anih thu a sawi a. Serchhip District chhunga hmalak tawhna leh hmachhawp awm hrang hrang te a sawi bawk a ni.

He hunah hian Pi Lalramsiami Sailo, Legal cum Probation Officer, District Child Protection Unit, Serchhip chuan Juvenile Justice (Care and Protection of Children) Act, 2015 chungchang a sawi a. Pi Liansangpuii, Protection Officer (NIC) chuan Adoption chungchang sawi bawkin, naupangte himna kawnga hriat tur pawimawh hrang hrangte ngaihthlak a ni bawk a ni.