Pu C. Lalrinsanga, Minister, Agriculture, Irrigation & Water Resources, Cooperation chuan vawiin khan Hriphaw khua-a Kuthnathawktute Ni hmanna-ah khuallian ni-a hmanpuiin Pu Lalrindika Ralte, MLA Hachhek AC chu khualzahawm a ni.

Khuallian chuan Hriphaw khuain cheng Nuai 173 chuang Kuhva man an tel thei chu a lawmpui thu sawiin chu an hlawhtlinna chu an bul tanna nise, thar chhuak tam deuh deuh zel turin duhsakna a hlan a. Kan ram economy siamthatu dik tak leh hmasawnna rahbi min siamsaktu inni a ti. An Kuhva tharchhuahte chu a leitu lam atanga rate siam tir mai lova, inlungrual taka awm a, inrawnkhawm chungin man man zawka an hralh theih nana hmala turin a chah a. Sawrkar pawhin man man zawka an thil tharchhuahte an hralh theih nan hma an lakpui mek thu a sawi a. Nizung hmanga siam cold storage kuthnathawktute hman tur ruahman mek niin chemical hmanga Kuhva scop siam dante chu mithiamte'n an enchhin mek bawk a ni a ti. SEDP hmangin ei leh bara kan ram intodelhna turin Potential Area Mamit District-ah pawh hmalakna tur ngaihtuah mek niin hma lak chhoh mek zel a ni a, kan tharchhuah ve theih reng chawhmeh tam tak hmun dang atanga kan mikhual rei ta lutuk chu pawi a tih thu sawiin keimahni'n kuttum humin taima taka kan ram intodelhna tura thawk turin a chah bawk.

He hun Khualzahawm ni-a hmanpuitu Pu Lalrindika Ralte, MLA pawhin thu sawiin a bial chhung Hriphaw khuaah kuthnathawktute Ni hman a ni chu lawmawm a tih thu a sawi a. Kuthnathawktu hlawhtling tak tak te chu duhsakna hlanin Party bil emaw a intibik lo tur leh thawhpui theih loh nei lo tura mipui kalkhawmte chahin Pathianin thlan tla chunga rim taka hna thawk tura min tih angin khawtlang thatna tura lungrual taka tan la deuh deuh turin a fuih a ni.

Hriphaw khua-a Kuthnathawktu Pawl aiawh leh MAHFED (Co- Operative Aizawl) aiawhte pawh he hunah hian thu an sawi bawk.

Vawiin Kuthnathawktute Ni hmannaah hian Kuthnathawktu hlawhtlingte chawimawi niin Kum 2019-a Kuhva thar tam mi 12 leh Coffee thar tam mi 9 bakah Serthlum thar tam mi 2 hnenah chawimawina hlan an ni a. Hriphaw khaw chhunga zirlai tithate chawimawina hlan nghal an ni. Hriphaw khua hian Kum 2019 chhungin cheng Nuai 173 chuang hret Kuhva manah an tel a. Coffee Kg 23000 chuang an thar chhuak bawk.

He hun hi Pu MS Dawngliana Pachuau, President YMA Hriphaw Branch-in kaihruaiin Pu H. Lalromawia, President, Village Council Hriphaw chuan kalkhawmte hnena lawmthusawina a nei a. Khawtlang huapin ruai tuihnai tak kilho a ni bawk.