Vawiin chawhnu khan I&PR Auditorium-ah Pu Lalruatkima, Minister of State, I&PR,etc., chuan Information & Public Relations Department(I&PR) leh Mizoram Journalist Association(MJA) ten ahuhoa kum 2020 kum bul inhlan tharna an buatsaih chu khuallian niin a hmanpui.

Sawrkar thuchhuah, sawrkar hmalakna leh sawrkar hmachhawp hrang hrangte mipui hnena hriattir hi thil pawimawh tak mai, sawrkar hnathawh ti chaktu leh ram hmasawnna atana thil tul a ni tih I&PR Minister Pu Lalruatkima chuan a sawi a. I&PR leh thuthar thehdahtu, MJA member te chu thawkho an nih angin an inpawhtlan pawh a pawimawh hle a ni a ti. Sawrkarin Chanchinbumite rawngbawlna pawimawh zia a hria a, duhsak pawh a duhsak hle tih a sawi a. Chanchinbumite inzirna leh ti bengvar tur atan tangkai takin Press Study tour te pawh sawrkarin a ruahman chho mek zel a. Mipui zirtirtu, sawrkar hmalakna te puangzartu leh mipuite ti bengvartu an nih angin Chanchinbumite tana Press Study Tour leh training buatsaih te chhunzawm hi sawrkar chuan a ngai pawimawh a ni a ti. "MJA te hamthatna tur atana ruahmanna Mizoram Journalists Contributary Pension Scheme, Advertisement Rate thar leh Press Enclave te pawh a hlawhtlin thuai theihna turin sawrkarin chak takin hma a la mek a. Chuvangin, chanchinbumite pawhin sawrkarin mipuite tana hriattur pawimawh leh hamthatna a duan chungchanga thuchhuah, sawrkar Press Release kaltlanga kan chhuah thin te pawh uar zawka min chhuah sak zel a kan beisei a. Inlawmtawnin ram hmasawn na turin tha taka kan thawhho zel a ngai a ni", a ti. I&PR Minister chuan tunlaiin Social Media kaltlanga thu thehdarh a awlsam avangin hrechiang mang lo leh chianna nei hmasa lova chanchin leh thil thleng thenkhat thehdarh leh pekchhawn zung zung te a hluar hle a. Thulengvak dik si lo, mipuite ti chiai thei chi te pawh thehdarh a ni thei a. Hemi kawngah pawh hian chanchinbumite chu thuchiang leh belhchiandawl zawl mipuite hriattir kawngah tun aia tan an lak nasat zual pawh a ngai dawn a ni a ti.

Pi Lallianpuii, Director, I&PR pawhin fuihna thu a sawiin I&PR Department leh Chanchinbumite inlaichinna hrisel neih chhunzawm zel a pawimawhna hriatthar leh a that thu a sawi a. I&PR leh Chanchinbumite hnathawh chu sum zawng teh theih a ni lova, sawrkar department dangte leh company anga kum khat chhunga tihhlawhtlin ngai(target) leh hlawhtlinna hmuh theih(achievement) tuk ni lo mahse mipui tana an rawngbawlna chu thil pawimawh tawp ni bawk si a ni a ti." Kan hna thawh in a tum hmasawnna kawnga mipui rilru sukthlek tir,thudik puanchhuah, zirtirna pek leh mipui mar deh te hi thil awl ai a ni lova, fimkhur renga thawh ngai, inzirngai reng leh nitina intahhriam ngai a nih avangin inthlahdah leh tihdikloh palh a thiang ve lo a ni", a ti.

Thusawitu dang Pu Zonunsanga Khiangte, President, MJA chuan Sawrkarin Chanchinbumite tih hmasawnna leh hamthatna tura hma a lakna zawng zawngah lawmthu a sawi a. Chanchinbumite intahhriamna tura Study Tour te, training leh workshop buatsaihte pawh a hlawkthlak em avangin chhunzawm zel turin sawrkar a ngen a. Sawrkar Policy puanzar leh hnathawh te mipui hriattir kawngah pawh theihtawp an chhuah thin thu a sawi a. Sawrkar hmalakna zirchianna leh mipuite tih bengvarna atana thil tangkai tak Project Sites visit te pawh sawrkar lamin rem a tih phawt chuan chanchinbumite chu an inpeih sa reng a ni a ti.

I&PR leh MJA te inhlantharna hun hi Pu C.Lalnunkima, Joint Director, I&PR chuan a kaihruai a. Pu F.Lalfakzuala, Deputy Director, I&PR in hunserh a hmang a. He hunah hian kum 2019 chhunga MJA member uihawm tak tak Chatuan Ram pan ta - Pu R.Lalhmangaihzuala, Vice President, MJA, Editor, Romei, Pu A.Rodingliana, Editor, Thuthar, Pu Pu Laldingliana Sailo, News Editor, Zonet, Pu Richard Lallawmzuala, News Editor, Zoram Tlangau leh Pu D.K. Lalhruaitluanga, Editor, Rihlipui, Champhai te sunna hun hman a ni a. Pu Lalramliana Chawngte, Joint Director, I&PR in lawmthu sawiin hun a khar a ni.