Lok Sabha MP Pu C. Lalrosanga chuan vawiin khan Zokhawsanga Assam Rifles awmna hmun tlawhin tun thlenga Aizawl khawpui atanga an insawn chhuah theihloh chhan te a enfiah.

Assam Rifles hotute chuan Lok Sabha MP hnenah hian Zokhawsanga insuan tura harsatna an tawh lian ber chu sipai ho chenna tur quarters sak zawh loh a la ni leh, sak zawh tawh ho pawh luah ngam loh a chhia tam tak a awm vang a ni tih an lo hrilh a ni.

Assam Rifles hotute chuan tun dinhmunah office building bik chu 90% sak zawh tawh a nih thu leh sipaite chenna tur quarters hi 60% sak zawh a nih thu lo hrilhin, a sak zawh hna hrim hrim chu kumin April thla ah zawh fel theih a nih an rin thu an sawi rualin sak zawh tawh sa zingah tha lo lai a tam avanga sak that leh a tul nual tur thu an sawi a ni.

Lok Sabha MP hian heng quarters sak mek te hi a hmunah a tlawh nghal a, heng quarters satu Engineering Projects India Limited (EPIL) te hnathawh dan chu lungawithlakloh a tih thu a sawi chhuak a, Type-II quarters hi block 19 sak tur niin block 16 sak zawh tawh a ni a, block thum sak mek a ni. EPIL ten in an sak hi a tira ruahman dan (design) nen a inmil lo nasa hle tih Assam Rifles hotute hian an sawi a, an sak zawh tawh sa an hnena hlan chhawn an tum pawh an la lak ngam rih loh thu sawiin, building thenkhat phei chuan a beam awm tura ruahman awm ta silo pawh a awm a awm nual tih an sawi. Block tinah hian chenna in 16 awm tur a nih rualin thenkhatah chuan a kim lo a, an sak zawh tawh sa ho pawh a chhawng chung ber chu tumahin an luah ngamlo tih an sawi bawk a ni. Officer ho quarters an sak pawh a tha lo hlawm hle tih an sawi bawk a, lirnghing na tak thlen theihna hmun a awm an nih avangin tuna a awm ang a heng building te hi luah a huphurhawm thu an sawi bawk.

Sipaite chenna in bakah EPIL in sipai ram chhung inkalpawhna kawng (internal roads) an siam te pawh a en nghal a, nikum September thla a siam ni mahse thla thum pawh ral hma in kawng hi a chhe leh nasa hman hle tawh a ni tih Assam Rifles hotute hian an sawi a. An chenna hmun tur sak chung chang a EPIL hnathawh danah an lungawiloh thu Home Ministry lamah pawh an thlen tawh thu an lo sawi a ni. Lok Sabha MP chuan Mizoram sawrkar leh mipuiten Assam Rifles te an hmun thara an insawn thuai chu an duhsak pui a ni tih sawiin an harsatna tawh te pawh a hmun ngeiah a enpui a a hriatchian thu a sawi a, Union Home Minister Pu Amit Shah hnenah amah ngeiin heng harsatna te hi a thlen sak tur thu leh a tul anga a bawhzui zel tur thu a sawi a ni.

Heng bakah hian Assam Rifles te chuan an ram chhung hmun 15 lai mai mimalin an rawn chuhpui thu an sawi bawk a, Mizoram sawrkar pawhin a hriatpui tawh thu leh chinfel thuai a nih an beisei thu an sawi bawk a ni.

Lok Sabha MP hian Zokhawsang panna kawnga leimin nasa tak Mizoram PWD ten a siam that mek a tlawh nghal a, Chief Engineer Pu Bowman-a hovin PWD official ten Lok sabha hi lo dawngsawngin leimin veng tura lung an rem chu kumin fur hma in an zawh hman ngei tur thu an lo sawi a. Leimin na lai hmun hi a a lei a nem em avangin hnathawh chak a har tih MP hi lo hrilhin lung an rem sa pawh leimin in a chhilh hnan leh avangin a design pawh siam that leh a, a bul atanga an thawh that leh thu an sawi a, JCB an duty tir reng avangin motor tlan theih nan kawngpui an thenfai nghal zel thu an sawi a, leiminna hmun chung lamah tui lut tur ven nan tui luanna tur a hranpa a an siam thu an sawi bawk. Lok Sabha MP chuan tlo tak leh rin tlak a siam a nih theih nan uluk taka thawh a tul a ni a ti a, MPWD leh Assam Rifles te chu hnathawh dan leh hmalak dan te inhriatpui tawn a sawiho zel thin turin a chah a ni.