Nimin (Nilaini) chawhnu dar 2:00 khan Pu Hmingdailova Khiangte Chairman, Mizoram Youth Commission leh Tuirial Bialtu MLA ni bawk chuan Bharat Nirman Rajiv Gandhi Sewa Kendra Building, Rs 8,73,000 senga sak chu Zanlawn ah a hawng a; hei hi MGNREGS sum senga sak a ni.

Hawnna thu sawiin MLA chuan Mizoram a sorkar insak zawng zawng hi neitu rilru pu chunga sak ni vek sela chuan Zoram hmasawnna hmel alang duhawm lehzual ang. Mizoram hi chhiah chawi mumal si lo khua leh tui tha nia inchhal si te awmna state a ni  a; chhiah chawi kan hreh em em a ni, khua leh tui tha dik tak chuan chhiah chawi tlak leh chawi thei nih hi a hlutzia kan hre tur a ni. Eirukna leh hlemhletna hi rilru chhungril atangin a in tan a, chu chuan a taka hlemhletna a rawn hring chhuak a, kan kristianna leh sakhawmi na hian kan nunah awmzia a nei thui lo thin a, Sawrkar laka kan rinawmna kawngah pawh min pui lo a ni a ti.

Thusawitu dang Pu R.Lalremsanga BDO Thingdawl chuan he In thar hi vantlangin an mamawh apianga an hman tur a ni a, Pindan hrang 3 a awm a; pindan pakhat hi mikhual thlenna tur buatsaih a ni a, pindan pakhat dang chu VC Office leh NLUP mamawh atana hman tur a ni a, pindan lian ber chu vantlang inkhawmna tur niin, mi 100 vel thutkhawm theihna tur a ni. NGO leh khawtlang pawl dang te tan pawh a tangkai hle ang a ti.

 A thawh khatna ah hian Thingdawl RD Block huam chhungah Zanlawn, Khamrang, Lungdai, Bukpui leh North Hlimen ah sak a ni a; khaw dang 4 te pawhin an zo thaw khat tawh hlawm. Tunah hian khaw 5 ah sak belh leh turin ruahmanna kalpui mek a ni.

He hawnna inkhawm hi Pu Ngaihtuahkima VCP Zanlawn chuan a kaihruai a; NGO hrang hrang hruaitu leh Sawrkar hnathawk te an tel a ni.