2454/2025-2026

Aizawl the 28th November 2025: Vawiin khan Uttar Pradesh state khawpui, Lucknow-ah Bharat Scout & Guides kum 60-na lawmna leh 19th National Jamboree a ruala hman a ni a. President of India Pi Droupadi Murmu chuan a hmanpui a. Mizoram Chief Minister Pu Lalduhoma hnenah Bharat Scout & Guides chawimawina sang ber Silver Elephant Award hlan a ni.

Chawimawina lehkhaah hian Chief Minister Pu Lalduhoma hnena he chawimawina an pek chhan chu Bharat Scout & Guides hmalaknaa a thawh that chungchuan vang (Most Exceptional Service) a nih thu a inziak.

Chief Minister chuan, "Mizoram mipui, khua leh tui tha, ram leh khawtlang tana inpe zo em em, midangte nena thawhho thiam, mahni inphata midangte tanpui tura inpeih reng thinte vangin he chawimawina hi min pe niin ka hria a. Keima mimal hlawhtlinnaah ka ngai lo va, Mizoram mipuite hlawh chhuah zawk a ni," a ti a. Mizorama Bharat Scout & Guides hotute leh Sports & Youth Services department te thawhrimnaah lawmthu a sawi bawk.

He chawimawina hi Mizo pasarihin an lo dawng tawh nia hriat a ni a. A dawng hmasa ber chu Pu Hrangthanga (L) niin kum 2000 khan a dawng a, Chief Minister hmaa a dawngtu hnuhnung ber chu Pi Lalrosangi niin kum 2017 khan a dawng a. Vawiinah Chief Minister hian a dawng ve leh ta a ni.