1727/2026-2027

Aizawl the 11th August, 2026: Vawiin chawhma dar 10 khan Minister Pu B.Lalchhanzova, Aizawl East II bialtu MLA ni bawk chuan a pisaah UD&PA hotute leh Dawrpui khawtlang hruaituten Aizawl Lammual cheithat tura hmalakna kal mek chungchangah, Dawrpui vengchhung nghawng thil tul te an sawi ho.

Assam Rifles in an chhuahsan hnua Lammual chei that dan tur Master Plan siamah Dawrpui Local Council, MHIP leh YMA te hmunhma neih mekna Bazar Bungkawn a mi chu Aizawl Square area ni tura ruahman niin khawih danglam a ni dawn a. Sawrkarin ruahmannna a siam sak dante sawiho turin vawiin meeting hi neih a ni.

Pu B.Lalchhanzova chuan Aizawl khawpui laili lai hmelhmang tihdanglam a nih dawn avangin heng hmalakna te hi Lammual Beautification nena kalkawp tur a ni a; an hmunhma te chu cheimawiin, khawpui faina leh cheimawina ngaih pawimawh a ni dawn, a ti.

Dawrpui khawtlang hruaitute chuan an bialtu MLA in thahnem a ngaihpuinaah lawmthu an sawi a. Heng an khawtlang ram huam chhunga sawrkarin a khawih danglam turah compensatory fund pe mai lo a, an ram neih ang an humhim theih nan leh building thar tha tak tak sak nan hmalak a nih dawn avangin lawmthu an sawi a. Chief Minister Pu Lalduhoma leh UD&PA Minister Pu K.Sapdanga ten an ruahman pui a nih avangin an chungah pawh lawmthu an sawi a ni.

Pu B.Lalchhanzova chuan Dawrpui Veng chu Aizawl khawpui laili leh langsar laia awm a ni a; mawi taka chei a nih tur thu sawiin a enkawl kawngah pawh Dawrpui khawtlang te chu theihtawp chhuah zui turin a chah bawk a ni.

UD&PA Director Pu Jacob Lalawmpuia pawhin Aizawl East II bialtu Minister-in sawihona a buatsaih chu lawmawm a tih thu a sawi.

Aizawl square in a huam chin, Dawrpui Veng  hmun thenkhat chei thatna tur Plan chu presentation hmanga thlirho niin, zawhna leh chhanna hun hman a ni a. Building awmsa thiah turah hian mi mal ram pali leh pawl hminga ram awm pathum a tel a ni.