1728/2026-2027

Saitual, the 11th August, 2026: Vawiin khan District Level Panch Sammelan (VB-G RAM G) chu DC, Conference Hall, Saitualah neih a ni a, Addl. DC Pu Lallawmawma chu khuallian niin hun a hmanpui. He hunah hian Viksit Bharat-Guarantee for Rozgar and Ajeevika Mission (VB-G RAM G) chungchang zirhona neih a ni a, Saitual District huam chhunga Village Council tin atangin aiawh pakhat theuh an tel a ni.

Vawiin hun hmannaah hian khuallian Pu Lallawmawma Addl. DC chuan thu sawiin, VB-G RAM G chu mission mode a kalpui tum a nih thu a sawi a, India ram chu kum 2047-ah chuan ram chak leh ram hmasawn tawhte (developed countries) el phaka hlankai tum a ni, a ti. VB-G RAM G chu kum 2047 a ram hmasawnna thlen theitu zinga ruhrel pawimawh tak a nih thu a sawi a, scheme tha tak tak lo awm tawhin scheme tha dang a rawn hring thar zel a, MGNREGA ni 100 inhlawhna tia kan hriat thin pawh VB-G RAM G-in rawn thlakin, ni 125-ah tihpun a ni, a ti. Khuallian chuan VB-G RAM G chu thingtlang mite tan a hmasawnna leh changkanna thlen theitu a nih thu sawiin, hna kan thawh dan leh ruahman danin kan hma hun thui tak a hril avangin he zirhonna hi a pawimawh hle a ni, a ti a, rualkhai taka khawchhung miten hmasawnna an neih theihna atan tan la zel turin kal khawmte chu a chah a ni.

Hun kaihruaitu Pu V. Laldinsanga Project Director & Addl. District Programme Coordinator (VB-G RAM G) pawhin thu sawiin, VB-G RAM G chu MGNREGA thlaktu anih avangin mumal taka inzirtirna leh inhrilhfiahna neih a pawimawh thu a sawi a. Dr. KT Pakhuangte, Associate Professor, SIRD & PR leh Pu David Lalchhuanawma, Assistant Engineer DRDO Saitual-te chu Resource Person niin, an ni hian VB-Gram G hmathlir leh thil tum zirtirna hun an hmang a. He dan hnuaia Panchayati Raj Institution-te mawhphurna leh chanvote, VB-Gram G hnuaia chhungkua in register theite, hmasawnna programme lo awm sa tawhte nena thawhho dan turte, thil dik leh langtlang taka mipui hmaa chhawpchhuah dante an zirho a ni.