Vawiin chawhnu khan Mizoram State Games 2019 Kolasib Assembly Constituency Organising Committee Chairman Pu K Lalrinliana, Minister of state for Food, Civil Supplies & Consumer affairs department, bialtu MLA ni bawk hovin Ogranising Committee ten DC Conference Hall, Project Veng, Kolasib ah thutkhawm vawi thumna an nei a, Vice Chairman Pu Zoensanga, DC Kolasib in he thutkhawmna hi a kaihruai a ni.

Pu K Lalrinliana chuan Mizoram State Games 2019 chu Mizorama a hmasa ber tur a nih angin Kolasib Assembly Constituency aiawh a infiammite leh Organising committee te chu ram pum huap infiamna hrang hranga inelna buatsaih tihlawhtlingtu atan an pawimawh thu a sawi a, an mawhphurna theuh te chu phur tak a hlenchhuah tum turin a chah a ni. Minister chuan Organising Committee te leh infiammite chu Kolasib Assembly Constituency tana fehchhuak tur an ni tih hria a thahnemngaitak leh neitu nihna pu chunga theihtawpchhuah turin a chah a, Kolasib Assembly Constituency ti hmingthatu nih tum a an telna kawng theuhah hlawhtlinna chan tum a bei turin a fuih bawk a ni.

Vawiin thutkhawmah hian State games hmaa players te inpuahchah nana sum mamawh te, sport discipline hrang hrangte dinhmun leh inbuatsaihna te, inelna kalpui a nih chhunga veivahna leh thlen dan tur te, Jersey leh thil tul dang te sawi ho a ni.

State Games 2019 Kolasib Assembly Constituency Organising Committee thutkhawma tarlan danin Kolasib Assembly Constituency atangin State Games a tel tur infiammi 271 ziah luh tawh a ni a, infiamna chi hrang 21 a tel thei tur a hmalak a ni.