Mizoram Science, Technology & Innovation Council (MISTIC) leh MHIP Zemabawk Branch-ten hmeichhiaten eizawnna ngelnghet zawk an neih theihna atana an thawhhona hnuaia project ‘Enhancement of livelihood options for Rural Women in Mizoram’ tih chu bul tan a ni a. He project hnuaia Hmeichhe Training Centre, Zemabawk Middle School venga MHIP building chunga sak thar chu Dr. R.K. Lallianthanga, Chief Scientific Officer, MISTIC, Science & Technology chuan a hawng.

He training centre leh project hawnna inkhawm hi Pu Samuel Lalmalsawma, Senior Scientific Officer chuan a kaihruai a, kalkhawmte hnenah lawmthu sawiin theihtawpa project hlawhtlin theihna turin tan la theuh turin a sawm a ni. Pu Davy Lalruatliana, Scientific Officer chuan report a pe a, project hnuaia training theih tur hrang hrangte chu ar vulh leh vawk vulh dan bakah ei in chi hrang hrang siam dan te a nih thu a sawi a. Heng atan hian zir tur course te pawh siam tawh niin hmeichhe thlanchhuahte tan theory leh practical-in training buatsaih zui tur a ni a ti. Tin, Zemabawk MHIP Secretary, Pi Zanguri pawhin thu sawiin hetiang ang project-te hmeichhiate tan a lo awm thei chu lawmawm a ti a, trainees-te pawhin theihtawp chhuaha ti turin a fuih a ni.

He hunah hian Dr. R.K. Lallianthanga, Chief Scientific Officer & Member Secretary, Mizoram Science, Technology & Innovation Council chu khuallian a ni a. Khuallian hian thu sawiin, he project hi MISTIC ten an siam niin, Science for Equity, Empowerment & Development (SEED) Division, Department of Science & Technology, Govt. of India-ah thehluh a ni a, anni chuan lo pawmin MISTIC leh MHIP Zemabawk ten an kalpui ta a ni a ti. Kum 3 lai thawhhona thuthlung siam a ni a, hetih hun chhung hian hmeichhia hna neilo tam tak ten an training dawn a, certificate pawh pek thlap an nih tur thu a sawi. Tin, hei bakah hian an training-na tur hmanrua leh chakkhai tam tak chu pek an ni dawn bawk a ni a ti.

AMC Ward VII councillor Pi K. Lalhmingliani pawhin thu sawiin a ward enkawl chhungah hmeichhe chawikanna tur project bul tan a ni chu lawmawm a ti a. MISTIC lama thawktute chu khawtlang hmasawnna tura thawk chhunzawm zel turin a sawm bawk.

He hun kharna atan hian Dr. Lalchhandami Tochhawng, Scientific Officer chuan kalkhawmte hnenah lawmthu a sawi a ni. Hemi hunah hian training turte bakah Zemabawk MHIP, Local Council leh YMA aiawh te an tel a, Science & Technology lama thawktute leh Trainer turte an tel bawk a ni.