Nimin (11.10.2016) khan Tuirial Bialtu MLA Pu Hmingdailova Khiangte chuan Hortoki tlawhin Kawnpui leh Hortoki inkar kawng chhiat avanga Hortoki mipui ten harsatna an tawh chu a hmun ngeiah kalin a enfiah a, MLA hi khawtlang hruaituten lo dawngsawngin an harsatna tawh mek te an lo sawipui a. Pu Hmingdailova chuan Hortoki khawtlang chu fakin an lungawi lohna lan tir kawngah sawrkar thu ngaichang thiam tak a an in thunun thei chu lawmawm a ti a. kawngchhe chungchang chu sawrkar pawhin hriatpuiin Dt 13.10.2016 dar 2:00pm hian Chief Minister hova hmalak dan tur reka meeting neih tur a nih thu MLA chuan a sawi lang bawk.

He hunah hian Pu Lalhmingliana SDO (C) Kawnpui pawhin thu sawiin khawtlang hruaitute chu fakin, tharum hmanga indawr aiin dawhkan kil hova sawifel tho a ngaih thin avangin tha taka sawi ho hi a tha ber fo a ni a ti.

Pu Lalngaihawma VCP Hortoki pawhin thu sawiin, tun dinhmunah Hortoki ah lirthei mipui phurtu te kawngthat loh avangin an tlan duh tawh lova, Damlo leh pawimawh zual pawh Lawng hmanga inphurh a ngaih tawh thu a sawi bawk.

Hortoki JAC hruaitute chuan an khaw kawng chhia sawrkarin a hraitpui a, Chief Minister hova sawi ho a nih tur chu lawmawm an ti in a thlamuan thlak an tih thu an sawi.

Bialtu MLA hi SDO(C) bakah Er. Romalsawma SDO PWD Kawnpui, Pu H. Lalchawimawia OC Kawnpui P/S ten an tawiawm a ni.