Nimin ah khan Home Minister Pu R.Lalzirliana leh Mizoram State Commission for Women a Chairperson ni mek, Pi Vanlalawmpuii Chawngthu, MLA te chuan Tualbung khawtlangin an khaw zirlai hlawhtling te leh an khawchhuak infiammi hlawhtling te chawimawina hun, an khaw Community Hall-a an buatsaih chu an hmanpui a.

Home Minister Pu R.Lalzirliana chuan Mizoram a zirlai hlawhtling te zawng zawng a lawmpui thu sawiin malsawmna leh hlawhtlinna hmu turin nu leh pa thuawih chu tihtur hmasa ber a nih thu a sawi . Aia upa zahthiam, hawihawm leh tlawmngaihna te chu Mizo hnam ti 'Mizo' tu a nih avangin " He Zonunmawi theihnghilh thak khawpa hlawhtlinna chu hlawhtlinna khingbai a ni a; Mizo ni si lehkhathiam, hnasang tak thawk bawk emaw sum tam tak thawkchhuak te thleng pawn Zonunmawi an hriat si loh chuan Mizo mipui ten kan ngaina lova kan ngaisang lo a ni", a ti. Mizo zirlai te chuan an zirna ah hnamdang te khum tum tur leh chumi ruala Zonunmawi erawh theihnghilh hauh lo tura chah in Zirlai Pawl hruaitute pawh zirlai an nih anga an zirlaipui te entawn tlak a tan la turin a chah a ni.

Home Minister Pu R.Lalzirliana chuan ramvenhimna lam sawi chhunzawm in Mizo mipuite leh sawrkar chuan remna leh muanna duha Hnam pasaltha ten silai an tun hnu khan ralthuam hmanga tharum thawh emaw remna leh muanna tichhe zawnga kawhmawhbawlching Mizoram chhungah awm an rem ti tawh lo a ni ti." Remna leh muanna kan duh ve ve avangin HPC-D leh sawrkar chuan boruak tha tak hnuaiah inbiakna kan nei mek zela, remna nghialnghet leh tluantling kan siam ngei ka beisei", a ti a. Christmas leh Kumthar vuakvet ah pawh khauh taka halpuah leh halmawi khuahkhirh chhunzawm a nih tur thu a tarlang bawk a ni.

Thusawitu dang, MSCW Chairperson Pi Vanlalawmpuii Chawngthu, MLA chuan Zirlai te chu mi hlawhtling an nih hunah pawh an khawchhuahna, an pian leh murna te hre reng tur leh chawisang thiam turin a chah a. Hnam thil leh ziarang theihnghilh phei chu a thianglo a ni a ti.

Pi Vanlalawmpuii Chawngthu, MLA chuan Mizo hmeichhia te dinhmun a that chhoh mek zel laiin Mizo hmeichhia ten an chanvo bakah dan hnuaia an dinhmun humhim sak a nihna te chiang zawka hriat an tum a tul tih a sawi a. Mizo mipa tam takin an nupui leh hmeichhia te an hmuh dan an thlak a hun thu sawiin hnamchangkangzawk-te entawna hmeichhia te chu an tlukpuia an en a hun ve tawh a ni a ti. Ram leh Hnam chhanhim na atan leh hnam zahawm na tura hmeichhia te mawhphurhna te pawh tarlang in Mizo Hmeichhia te chu hnamdangmi pasal a neilo turin a chah.

Tualbung khawtlangin chawimawina hun an buatsaih ah hian Class-X chin chunglam zirlai hlawhtling te bakah an khawchhuak infiammi hlawhtling, Boxer P.C.Lalmuankima leh Taekwondo Gold Medalist Lalnunkimi te hnenah lawmpuina thilpek hlanna neih a ni. Chawimawina hun hman a nih hnu hian Home Minister leh MSCW Chairperson te chuan Lunglawn hmun, Tualbung khaw dai ah thingtiak an phun a ni.