Vawiin chawhnu khan Circuit House, Kolasibah Mizoram State Games 2019 a Kolasib Assembly Constituency Organising Committee, Selection Committee, Manager, Coach leh Assistant Coach ten Mizoram State Games thlirletna hun an hmang a, bialtu MLA Pu K Lalrinliana’n he hun hi kaihruaiin Pu Zoengsanga, Vice Chairman kal chhuak ta leh Pi Sangchhin Chinzah, DC Kolasib ten an telpui bawk a ni.

Vawiin Kolasib A/C State Games thlirletna hun ah hian Pu Joseph Lalrinawma, Secretary, Kolasib Constituency Committee chuan report pein Kolasib atanga infiam a fehchhuak ten medal 24 an hlawh chhuah thu leh chung zingah chuan Gold medal 6, Silver 4 leh Bronze 14 te a nih thu a tarlang a ni. He hun ah hian State Games vang a zuk leh hmuam a insum phah tate leh sim phah nana hmang an awm thu te, thalai tam tak ten hriselna kawng an dah pawimawh phah thu te leh infiamna chi hrang hrang mit tawh anga ngaih theih, State Games avanga thangthar zawk ten an hriat leh phah thu te tarlan a ni a.

Pu K Lalrinliana chuan Kolasib Assembly Constituency aiawha infiam a kal te chungah lawmthu sawiin hruaitute inpekna leh infiammite thuawihna zar a tiang dinhmun thleng thei an nih thu a sawi a, inlungrualna leh thawh hona tha tak hnuaia Kolasib Assembly Constituency hruaituten an kaihruai thei chu fakawm a tih thu a sawi bawk a ni.

Bialtu MLA chuan medal la te chawimawina hun hmanpuiin Gold media la te hnenah Cheng 3000, Silver medal ah Cheng 2000 leh Bronze medal la te hnenah Cheng 1000 a hlan bawk a ni.