1778/2022-2023
Mamit 1st September, 2022 : Vawiin khan Feed Mill Hall, Mamit Dinthar-ah Er. H. Lalzirliana, 3-Mamit Bialtu MLA chuan Mamit Piggery Cooperative Society Ltd. leh Cooperative Department, Mamit buatsaih Vawkchaw leh Ranchaw siamna hmun khuallian niin a hawng.

Er. H. Lalzirliana chuan Mamit District tana mellung pawimawh tak ni tur Ranchaw siamna tur hawn a ni ta chu thil lawmawm tak a ni a ti a, Ran vulhtute a bikin vawkvulhtute'n Sawrkar atanga tanpuina pawh beisei lova phur tak leh tha tho taka vawk an vulh laiin hripui leng na tak avanga vawk chantute tawrhna chu a tawrhpui thu sawiin, Mizoram Sawrkar pawhin ramdang atanga Vawk leh Ar lalut lova, intodelh kalpui tum a nih laiin hrileng avanga harsatna kan tawk chu pawi takzet a ni a ti. Kan kawtkai ngeia ranchaw siamna hmun kan neih hian rahtha a chhuah ngei a beisei thu sawiin ranin chaw hrisel an ei theih phah dawn a, sa thianghlim leh hrisel kan ei theih phah ngei a beisei thu a sawi.

MLA chuan Mamit Piggery Cooperative Society bul tantute fakin an laka mite'n rinna an ngah zel theihna tura tih tak tak nena hma la zel turin a chah bawk.

Bialtu MLA hian Mamit Piggery Cooperative Society Ltd. te hmalakna puih nan Rs. 1,00,000( nuaikhat) a hlan bawk.

Pu Lalthangfala, District Cooperative Officer, Cooperative Department Mamit-in technical report a pek danin Cooperative Department, Mamit chuan Animal Feeds Processing Plant atan hian Rs. 7,00,000/- (nuai sarih) in bul a tan saka, he pawisa hi Machineries Rs. 3,00,000/- Animal Feeds Bags - Rs. 50,000/- Vaimim leh Bekang chi lei nan Rs. 50,000/- Groundnut Oil cake Rs. 50,000/- Electrification Rs. 50,000/- a vaiin Rs. 5,00,000/- (nuainga) sen ral niin pawisa la bang Rs. 2,00,000/-( nuaihnih) hi Mamit Piggery Cooperative Society-te hnenah vaimim lei nan pek a ni bawk. Vawiin-a hawn tak Animal Feeds Processing Plant-ah hian nikhatah 10qtl (bag 20) herchhuah theih a ni.

Mamit Piggery Cooperative Society Ltd. te hi kum 2014-ah member 30 in an din a ni a, tunah hian member 142 an awm mek a ni. Mamit Piggery Society-te hian hripui leng avangin bleaching powder-te semin Vawkchaw Silchar atanga an lakluh chu man tlawm zawkin Vawkvulhtute hnenah an hralh thin bawk a ni.

Vawiin ranchaw siamna hawnna hun hi Pu C. Sangthuama, Chairman Mamit Piggery Cooperative Society Ltd. chuan kaihruaiin, Mamit khawpui chhunga vawkvulhtute an tel a ni.