2821/2024-2025

Dated Aizawl, the 4th November, 2024: Vawiin chawhma dar 11 khan Mission Veng MUP chuan an din champhaphak kum 50-na (Golden Jubilee) lawmna hun chu Synod Conference Hall, Sikulpuikawnah an hmang a. He hun hi Pu Lalchhuanthanga, Aizawl South II bialtu chuan khuallian niin a hmanpui a; Golden jubilee lawmpuina sumfai a hlan nghal bawk a ni.

Khuallian Bialtu MLA ni bawk Pu Lalchhuanthanga chuan upate chu Sawrkar laipui leh UNO thleng pawha ngaihpawimawh hlawh tak an nih thu sawiin, hmanlai finna tunlai thlenga min rochuntute an ni, a ti a. Tawnhriat tha tak takte paw chhuaktu an ni tih tarlangin, upa pawl member-te chu bial chhung tihmasawnna tura thawhhopuiah a sawm a. Bial chhunga hmasawnnna chi hrang hrangah upate thurawn chu lak fo pawimawh a tih thu sawiin, an tu leh fate hmasawnnna tur a ngaihtuahna senpui thin turin a sawm nghal bawk a ni.

Khualzahawm bialtu AMC Corporator Pu Malsawmzuala Ralte, MYC Chairman ni bawk chuan upate chu an hluin zah an phu tak zet tih sawiin, hei hi hriain tunlaiah pawl tam takin senior advisor-te an lo nei ta a ni, a ti a. Upate thurawn lak nachang hriat chu pawl kal dikna tura thil pawimawh tak a ni tih a sawi bawk. 

MUP Mission Veng Branch hi November ni 4, 1974 khan din tan a ni a. Hetih laia hruaitute chu:

President  -    Pu Vanchuanga

Vice President  -    Pu CZ Huala

Secretary     -    Pu DK Kawnga

Asst. Secretary -    Pu Paiha

Treasurer    -    Pi Meli 

Fin. Secretary     -    Pu Thangrikhuma te an ni. 

Vawiin  Golden Jubilee lawmna hi Branch President Pu Lalthangliana Varte chuan kaihruaiin, Jubilee thuchah a sawi nghal a. Pu Lalkanglova Sailo, Secretary hnen atangin report kimchang leh ngaihnawm tak ngaihthlak a ni a. Hruaitu hlui la damte hnenah chawimawina hlan niin, kum 90 tling tawh mi 13 te lawmpuina thilpek hlan an ni a. Pu R. Thankima, Vice President chuan lawmthu sawiin hun hman hi a khar a ni.