1478/2024-2025

Dated Aizawl: the 7th August, 2024: Vawiin chawhma dar 11 khan, Lungbial, Zemabawk a Government Aizawl North College Girls Hostel tur hawnna chu Aizawl North College-a thawktu leh Zirlai thenkhat bakah, Zemabawk Local Council Chairman leh mi pawimawh dangte nen neih a ni a. He hun hi Pu Lalthansanga, Minister, EF&CC Aizawl East-I bialtu MLA ni bawk chuan khuallian niin a hmanpui.

Khuallian chuan thu sawiin, Aizawl North College chu thingtlang lam atanga belh tam ber pawl college a nih thu te, college kalte tana hostel tangkai zia leh amah ngei pawh hostel a lo awm tawh thin a nih avanga hostel pawimawhzia hre chiangtu zing a mi a nih thu te a tar lang a. Hei bakah hian, Rationalisation of Teachers chungchang pawh sawiin, Mizoram Work Ethics chu tihmasawn a, Minimum Management Maximum Works kalpui a pawimawh thu a sawi bawk a ni.

Hemi zawh hian, thawktute lam atangin hostel din chhoh dan chungchang leh a kal zel dan tur a ruatdan report chu Pu H. Zonunsanga, Chairman Aizawl North College Women's Hostel Management Committee hnen atangin ngaihthlak a ni a. Hun kaihruaitu, Prof. S. Haukhanlian Mate chuan lawmthu sawina te neiin hawnna hun chu tihtawp a ni.

Government Aizawl North College Girls Hostel hi kum 2013 a UGC Grand hmanga sak leh din chhoh kha a ni a. Kum 2017 October-ah peih fel niin, thuam that chhoh bek bek a nih hnuah, kumin hian luah tan theih tur leh hman tangkai tura chhawp chhuah a lo ni ta a ni. He hostel-ah hian, remchang ang zela mi 20 thleng pawh awm thei tura duan a ni a;  awm man thla khatah Rs. 3500 chauh chawiin College kal lai naupang te chuan in luah tur leh Aizawla awmna tur mai remchang nei lo pawhin zirna an chhunzawm theih phah dawn a ni.