1479/2024-2025

2024 Thlazing ni 7: Vawiin khan Lunglei District Deputy Commissioner Pu R. Lalṭhazuala ruahmannain inspection team chuan Lunglei leh Tlabung inkar National Highway-302 kawngpui laih zauh hna thawh mek dinhmun leh fur ruahsur avanga lirthei tlan leh khualzinte'n harsatna an tawh ṭhin sut kian a nih theih nana hma lak dan turte a hmunah kal chilhin an enfiah.

Inspection team-ah hian Additional DC Pi Rochuangkimi Khenglawt bakah, Settlement Officer Pu Lalrinawma leh Land Revenue & Settlement (LR&S) Department, Lungleia thawktute an tel a. He lai kawngpui zauh hna thawh mek enkawltu National Highways & Infrastructure Development Corporation Limited (NHIDCL) hnuaia Authority Engineer-te leh hna thawktu contractor-te'n lo dawngsawngin, an hna thawh mek dinhmun leh harsatna an neihte an lo hrilhfiah a. Fur ruahsur leh lei min avanga kawngpui chhe lai te, leivung paihna hmun ruahman dan te, hmun thum - Chhumkhum, Lungsen leh Tuichawnga khaw chhung helna kawng by-pass road siam mek te en ho niin, NH-302 kawngpui chu mipui chakkhai leh mamawh phurhna kawngpui pawimawh a nih angin lirthei veivak leh khualzin mipuite'n harsatna an tawh loh nana chak zawka hna thawh a nih theih dan tur te, kawng chhe zual lai thawm ṭhat thuai a nih theih dan tur te sawi ho a ni.

Contractor-te chuan hmun ṭhenkhatah chuan sub-grade an phah hnuah furin a nan avangin GSB phah hman a ni lo va, fur ruahtuiin sub-grade phah sa pawh tichhiain, kawngin a chhiat zual phah tih an sawi a. Kawng chhe zual lai pawh a theih ang anga an thawm ṭhat ṭhin thu leh NH-302 Monitoring Committee te dina vil zui reng a nih thu an sawi bawk.

NH-302 kawngpui zauh hna thawh mek hi Hrangchalkawn aṭanga Tlabung thleng niin, kawng hluiah chuan kilometre 96-a thui a ni a. Tuna kawng thar ruahman ang chuan KM 75.070-a thui tur niin, package hnihah ṭhen a ni a. Package A hi Hrangchalkawn aṭanga Chhumkhum thleng niin, KM 37.420-a thui a ni a; Package B hi Chhumkhum aṭanga Tlabung thleng niin, KM 37.650-a thui a ni thung.

NH-302 kawngpui zauh leh siam ṭhat hna hi BRN Infrastructures Private Limited (BRNIPL) te'n thawkin, tun dinhmunah Package A-ah 38.20% leh Package B-ah 37.65% an zo tawh a. Kawng laih leh kawng luan bakah, lui kawr kanna tur lei dawh tur pali (major bridge 3 leh minor bridge 1) awm bawkin, lei dawh hna pawh hi thawh ṭan mek a ni.