1480/2024-2025

Dated Hnahthial, the 7th August, 2024: Vawiin chawhnu dar 01:00 khan DC Meeting Hall-ah Hnahthial Deputy Comissioner, Pi Rita Lalnunmawii Pachuau kaihhruaiin ‘District Level Task Force on Ruihhlo Do’ meeting chu neih a ni a. Hnahthial SP, Pu Shivendu Bhushan leh tlawmngai pawl hrang hrang te he thutkhawmnaah hian an tel a ni.

He thutkhawmnaah hian DC chuan ruihhlo do chungchang ngaih pawimawh zual a tul thu sawiin agenda hrang hrang thutkhawmna hmasa zawka rel tawh te chu en nawnna hun neih a ni a. Hemi zawh hian he meeting-a agenda awmte chu en ho niin ruihhlo kaihhnawiha Hnahthial district dinhmun tlangpui sawi hona hun hman a ni. 

Thutkhawmnah hian ruihhlo tawlh luh a tlem theih nan Hnahthial district ramri, a bik takin international borders-a ruihhlo do pawl thawm that an nih theih dan tur te, tlawmngai pawlten ruihhlo dona kawnga an mamawh hrang hrangte phuhruk an nih theih dan tur bakah Hnahthial district huam chhungah, ruihhlo chungchang inhrilhhriatna, awareness programme neih a nih theih dan turte rel ho a ni.

Hnahthial SP, Pu Shivendu Bhushan chuan ruihhlo tawlh luh a tlem theih nan Police lam chuan theihtawp an chhuah thu sawiin hemi kawngah hian ramri a VC te, Taxi Owners Association te bakah tlawmngai pawl hotute nen thutkawmna an neih thin thu a sawi a ni.

DC chuan Hnahthial district-ah ruihhlo leh a kaihhnawih a lo hluar tak avangin khawtlangah nghawng tha lo tak tak a neih theih thu sawiin chumi avang tak chuan he thutkhawmna a tel hote chu ruihhlo do kawngah theihtawp chhuah tlang turin a chah a ni.