1481/2024-2025

Khawbung, 7th August, 2024: Vawiin khan Khawbung khawtlang chuan an khawchhuak - Prof Lalnilawma, Mizoram sawrkara Minister a nih lawmna leh chawimawina hun Khawbung Community Hall-ah an hmang.

He hunah hian Prof Lalnilawma chuan Khawbung khawtlangin amah lawmpuina leh chawimawina hun an hmang chu ropui  a tih thu a sawi a, an chhungkaw chunga khawtlang thatna chu an theihnghilh tawh dawn lo a ni, a ti. Prof Lalnilawma hian Khawbung khawtlang hruaitu ten amah chawimawina hun buatsaih an tum thu an rawn sawiin, mimal sum pek tur a neih loh avang leh sawrkar pawisa hman a duh loh avangin a hnar hmasak zet thu pawh a sawi a, khawtlangin anmahni insengso a hetiang hun an buatsaih sak chu a lawm tak zet tih a sawi bawk.

Rural Development Minister hian an chhungkaw chanchinte, lehkha a zir chhoh dan leh hna a thawh chhoh dan chanchinte sawiin, ram tana a tangkai ve theihna zawnah theihtawp chhuah tumin politics-ah a lut ta tih a sawi a. Prof. Lalnilawma chuan Khawbung khawtlangin intodelhna leh hmasawnna kawngah hmabak tam tak an la nei tih a hriatpui thu pawh sawiin, hma an sawn zel theih nan theihtawp chhuah pui a tum thu leh tlanchhiat a tum loh thu a sawi bawk a ni.

Prof Lalnilawma hian hmasawnna rotling din a nih theih nan kalkhawm mipuite thawhpuina a ngen a, sawrkar hmalakna lo enpui thin turin a chah. Mipuite chu a department chan hnuaia hna lungawithlak loh a awm chuan a hnenah thlen turin a ngen a, hna thawk tha lo te a dim dawn lo tih a sawi bawk. Hmasawnna hna thawktute hnen atangin sawrkarin engmah lak heu sak a tum lo a, hna tha taka an thawh erawh a beisei let thung, a ti. 

Horticulture Minister hian Khawbung khawtlang mamawh - Tarpaulin, Silpauline, Sprayer, Grass Cutter leh hlo tur te a hlan a. He hun pual hian Prof Lalnilawma farnu, Dr. Irene Lalrinpuii chuan nimin atang khan a thlawna inentirna an buatsaih bawk. 

Khawbung Community Hall-a hun a hman zawh hian Prof Lalnilawma hian Hlakungpui Mualah far thing a phun a. BDO Office-ah Khawbung RD Block hnuaia Self Help Group aiawh te nen inkawmhona hun tha tak an hmang bawk a ni. 

Prof Lalnilawma hi kum 2023 MLA Inthlanpuiah khan Tawi bial atanga thlan tlin a ni a, Mizoram sawrkarah Minister of State niin Department pathum - Rural Development, Public Health Engineering leh Horticulture te a enkawl mek a ni.

Prof Lalnilawma lawmna leh chawimawina hun hi Pu Lalchhanhima, Khawbung Branch YMA President, Organising Committee Vice Chairman ni bawk in a kaihruai a. Pu C. Rokhuma, VCP Khawbung chuan inlawmna thu sawiin, Pu R. Liankima, Adviser, Khawbung Welfare Committee leh Pi Biakveli, Prof Lalnilawma nu te pawhin thu an sawi a ni. He hunah hian Khawbung khawtlang chhunga pawl hrang hrang ten Prof Lalnilawma hi lawmpuina thuziak leh parṭhi an hlan a, mal zai leh hnam lam hmuhnawm tak tak te thlirin, hun hlimawm tak hman ho a ni. 

Prof. Lalnilawma hi Khawbungah zan a riak ang a, naktuk zingah Khawbung chhuahsanin Aizawl a pan ang. Prof. Lalnilawma hi Pu C.H. Lalmuanpuia, Director, Horticulture Department; Pi Lalchhandami, CEO, MzSRLM; Er. Lalchawimawia, Under Secretary, PHED; Champhai District-a a department enkawl hotute leh a chhungkhat laina ten an tawiawm a ni.