Biate leh a chhehvel a thingpui chingtute eizawnna dinhmun leh, helai hmuna thingpui zik sawngbawlna factory awm chhun, Samuel Tea Factory-in harsatna a tawh te leh sorkar puihna a dil chungchang ngaihtuahin nimin tlai khan NLUP Nodal Minister Pu H.Liansailova hovin NIB hotute, Industries leh Horticulture department hotute chu Minister office chamber ah an thu khawm a.

Biate leh a chhehvel khaw eng emaw zatah NLUP hmasa atangin thingpui huan siam chhungkaw 325 vel an awm a. An thar chhuahte hralhna tur Tea Factory a awm loh avangin thingpui huan tam tak chu enkawl zui lohvin a awm a. Mizoram economy thanna tur leh chhungkaw tam tak tana eizawnna tura hmalakna pawimawh, hetianga hlamzuih mai thei dinhmuna a awm hi Chief Minister Pu Lal Thanhawla chuan a vei em em a. Biate leh a chhevel a thingpui huan siamtu ten hlawhtling taka thingpuiah eizawnna an chhunzawm theih na turin hma lak ni se a lo tih angin nimin a Pu Liansailova hova thukhawm chuan thingpui huan siamtute hmakhua leh Samuel Tea Factory-in harsatna a tawh te chu ngun takin an ngaihtuah a. He tea industry hi Biate leh a chhehvel khaw tam taka thingpui huan neitute innghahna a nih avangin a theih dan ang anga Samuel tea factory chu tanpui tha an ti a.

Samuel Tea Factory hi tun hnai khan Biate-ah din niin April 10 khan a khawl hnathawh dan hlawhtling taka enchhin a ni tawh nghe nghe a. He tea factory lo din takah hian chhungkaw 45 in thingpui zik sikin eizawnna an chhunzawm leh mek a. Kartin thingpui zik hring quintal 30 vel an chhun khawm atangin Samuel Tea Factory hian chawlhkar khatah thingpuife quintal 6 a her chhuak thei a, chu chuan Mizoram chhung mamawh a la phuhru pha lo nasa hle a. Biate leh a chhehvel a thingpui zawng zawng her thei turin Samuel Tea Factory hian kum khata thingpui zik quintal 5000 sawngbawl thei tur khawl lian a bun lawk a. Mimal hmalakna a nih avangin factory hian a khawl hnathawh theih tur ang tak, full capacity in hna a la thawk thei rih lo va. A full capacity a hna thawk thei tura he factory in hmanraw leina tura a mamawh Rs.24.40 lakhs leh, chatlak lova huan neitute thingpui leisakna tur working capital Rs.32.77 lakhs a mamawh chu Pu Liansailova hova meeting chuan ngaihtuah sak tha an tiin NLUP hnuaiah hand-holding support pe turin Apex Board ngen ni se, an ti a ni.