Mizoram State Cancer Institute, Zemabawka din dan tur Mizoram sorkar rawn ruahmanpuia lokal, Dr.N.K.Mohanty, Special Director of Health Services (Medical Education & Training), Govt of India leh Prof.G.K.Nath,Chief of Cancer Hospital, AIIMS, New Delhi te chuan vawiin tlai khan Chief Minister Pu Lal Thanhawla chu a chenna bungalowah an hmuin hemi chungchang hi an sawipui a. Cancer Institute din tur bakah hian Falkawna Medical College din dan tur chungchangte an sawipui bawk a ni.

Central sorkar rawn tirh, Doctorte hian Chief Minister hnenah hian central sorkar tum vek turin Zemabawka T.B.Hospital hlui hi cancer veite enkawl nan khum 35 vel awm theihna tura chei tha a, bul lo tan phawtin, Mizoram State Cancer Institute khum 100 awm theihna tur siam nan sum central sorkarin a rawn la pe leh ang tih Dr. N.K.Mohanty chuan a ti a. Medical College tur pawh tun financial year chhung ngeia seat 50 tal bul tan thei turin Civil Hospitala clinical department lian zawng zawng Falkawna Referral Hospitala sawn phei phawt a tul thu an sawi bawk a. Hemi atana senso tur sum chu central sorkar bawk tum tur a ni ang an ti a ni.

Chief Minister hi a nupui Pi Lal Riliani bakah Pi Esther Lalruatkimi, Secretary, Health Services ten an tawiawm a ni