Vawiin chawhnu dar 2:30 khan Serchhip Helipad-ah Mizorama Helicopter Service tur chu hlawhtling takin tum chhintir a ni a, SDO (Sadar) Pi K. Vanlalruati leh Pu Robert C. Lalhmangaiha SDC & ASO-ten an lo dawngsawng a ni. He hunah hian Pu Saidenga, Dy. Controller, Aviation Department chuan ticket leh thil pawimawh dangte a rawn dah a, official-te nen thil pawimawh te an inhrilh hriat hnuah Aizawl lam an pan leh nghal a, Helipad-ah hian minute nga chiah hun an hmang a ni.

He trial landing neih tur hi sawrkar chuan fimkhur takin ruahmanna a kalpui a, kangmei chhuah palh thutha inring turin Fire Department-te chu an hmanruate nen an inchhawp a, harsatna awm palh thei laka inring turin Police te pawh duty-tir an ni bawk.

Helipad bulah hian innghahkhawmna tur Chawlhbuk sak zawh a ni tawh a, helicopter chuang duhte tan Pi Lalchharliani, DC office atangin ticket lak theih a ni ang. Ruahman lawk ang chuan Serchhip bik tan Inrinni-ah Aizawl atangin chawhma dar 09:00 a rawn chhovin Hnahthial a thleng a nga, Hnahthial atangin dar 09:40 a rawn let lehin Serchhip-ah passenger a rawn lam ang a, Aizawl a pan dawn a ni. Amaherawhchu he ruahmanna hi a tul dan a zira la tihdanglam leh theih tur a ni.