No.2061/2021-2022

Aizawl, the 31th August, 2021: Tunhnaiah Khawzawl District chhungah Covid-19 positive hmuhchhuah belh niin, veng/khaw thenkhatte chu an dinhmun zirchian a nih hnuah Covid-19 hrileng darh zel tur venna atan inkhuahkhirhna khauh zawk kalpui a ngai tih hriat a ni.

Biate khuaa Covid-19 hrileng inkaidarh zel tur ven nan Pu C.C Lalchhuangkima, Deputy Commissioner & Chairman, District Disaster Management Authority Khawzawl District chuan Section 34 (b) leh 34 (c) of the Disaster Management Act, 2005 tlawhchhanin Biate khua chu vawiin August ni 31, 2021 atanga thu leh awm hma Containment Zone-ah a puang.

Containment Zone chhungah hian a hnuaia tarlan inkhuahkhirhnate hi zawm ngei ngei tur a ni ang:

1. Tumahin mahni in/compound an chhuahsan tur a ni lova, lirthei hmanga veivah pawh khap a ni. Loh theih loha pawn chhuah leh veivah ngaite chuan VLTF phalna an la hmasa tur a ni.

2. Containment Zone-a luh leh chhuah khap tlat a ni. Loh theih loha luh leh chhuah ngaite chuan Village Level Task Force (VLTF) hriatpuinain la hmasain Deputy Commissioner hnenah phalna dil tur a ni. Hei hian Magistrate, Zonal Officer, Medical duty, Security duty, VLTF leh Essential service hna thawktute chu a huam lo ang.

3. Hemi hun chhung hian Containment Zone-a dawr/bazar leh office-te chu khar tur a ni.

4. Containment Zone chhunga miten ei leh in chungchanga harsatna an tawh loh nan VLTF ten uluk taka an dinhmun thlir chungin eichawp dawr leh bazar hawn chungchangah ruahmanna an siam ang.

5. VLTF te leh Containment Zone-a khawsa, harsatna leh mamawh neite chuan bialtu Zonal Officer/Incident Commander tarlante hnenah an thlen ang.

Incident Commander turin heng mite hi ruat an ni:
1. Pu Eliza Vanlalpeka, SDO, PHED Khawzawl
Phone No. 8974484711

2. Pi R. Vanlalduati, SMS, KVK Khawzawl
Phone No. 9615591207

Biate khua chu Containment Zone-a puan a nih tak avangin Khawzawl DC Office kaltlanga Biate khuaa kohhran inkhawm phalna (22.08.2021), Anganwadi hawn phalna (25.08.2021) leh School hawn phalna (19.08.2021) pek tawhte chu vawiin atangin sut nghal a ni bawk.