No.2062/2021-2022

Aizawl, the 31th August, 2021: Vawiin chawhma dar 11:00 khan Mizoram Secretariat (Main Building) luhna pui ber (Gate No. 1)-ah Mizoram Police Headquarters lam hmalaknaa lei Portable Baggage Scanner (bungrua, ipte, etc. enfiahna khawl) chu hman tan theih turin Addl. Chief Secretary Pu J.C. Ramthanga chuan a hawng.

Portable Baggage Scanner hawnna puala inkhawm tawi buatsaihah Addl. Chief Secretary chuan Home Department hmalakna a Mizorama office pui ber a venhimna atanga tangkai tak khawl thar hman a ni dawn ta chu lawmawm a ti a. Ram ralmuang a awm ni mah ila inralrinna thlahthlam erawh a fuh loh thu a sawi a. Police Headquarter lam hotute leh thawktute hmalakna a fakawm tih sawiin, Mizoram Sawrkar hmun pawimawh hrang hranga tha taka venhimna hna an thawh chu lawmawm a tih thu Pu JC Ramthanga chuan a sawi a ni.

Hawnna hunah hian Addl. SP (Security), General Administration Department officer te, GAD chhunga Secretariat Administration Wing officer-te leh Home Department lam hotute bakah sawm bik mi thenkhat an tel a ni.

Portable Baggage Scanner hi ‘Assistance to States for Modernization of Police Forces’ Scheme hnuaiah 2018-2019 atan 4 (pali) leh 2019-2020 atan 4 (pali) Central Sorkar atanga hmuh a ni a. East India Consortium hnen atangin Portable Baggage Scanner (Model : Kritiscan 6040) 8 (pariat) lei a ni.

Heng khawlte hi SP, Security kut a dah niin, anni hian a dahna hmun tur te buai puiin, MINECO Main Building nen hian Aizawl khawpui chhung a hmun pawimawh, security tih that ngai zual hmun 6 (paruk)-ah dah a ni. He Portable Baggage Scanner hmang hian Mizoram Secretariat Building-a lut leh chhuakte ip te, bungrua, leh thil dang dangte scan (enfiah) a ni dawn a. A chhungah engnge awm tih hawng kher lovin a hriat theih dawn a. A enkawl hna hi Secretariat venhimna thawk mektu Mizoram Police (Security) ten an kalpui dawn a ni.

Baggage Scanner khawl hi Vedant Technologies - Noida, UP te siam a ni a Kritiscan 6040 hi Multi energy X- Ray baggage scanner ang chi hi a ni. Airport, Sorkar office lian leh Metro-ah te hman a ni tlangpui. Black and white leh Colour in a scan thei a 20 screen image recall leh image 1,00,000 chuang a store thei a ni.