No.2063/2021-2022

Aizawl, the 31th August, 2021: India zalenna ni vawi 75-na lawmna ‘Azadi Ka Amrit Mahotsav’ kal zelah August ni 7, 2021 atang khan All India Radio, Aizawl chuan India ram zalenna sualtute chawimawina hun Inrinni, dar 10:30am-ah a hmang thin a. Zalenna sualtute zingah Mizo pa Pu Darthawma Renthlei chanchin hi abul tan nan All India Radio, Aizawl programme-ah lo chhuah tawh a ni a. A chanchin tlangpui chu hetiang hi a ni:

Pu Darthawma Renthlei hi May ni 15, 1921 khan Pukpui khua Lunglei district-ah a piang a, apa chu Chhinglaia a ni a, a nu chu Nubuangi a ni. Kum 1940, November thla-ah Army Medical Corps Nursing Sepoy atan a in pe a, Lucknow-a training tur an thlanchhuah mi 18 zingah a tel a ni. Sipai-ah hian November ni 27, 1940-ah nem ngheh a ni a, a regimental number chu 43508 a ni. Lucknow Recruit Barrack-ah a awm phawt a, chumi hnuah Military Hospital Lucknow-ah First Aid leh damdawi chungchangte zirin, Kum 1941, August thla khan Malaysia a Penang khua-ah thawn chhoh zingah telin, Penang-a an awm lai hian Japan chuan nasa takin Malaysia a rawn bomb a, an ni British lam hian indo thlawhna South East Asia ah hian a dah tlem em em mai a, he indona hmunah hian Pu Darthawma chuan a phak tawkin a bei ve a. Penang an chhuahsan hnu hian Kuala Lampur-ah chhuk thlain, sipai hmunpui chu Japan lamin an bomb darh zel avangin, Kuala Lumpur atang chuan Singapore lam an pan ta a, vanduaithlak takin Singapore chu February ni 2, 1942 khan Japan lamin an la ta a, tichuan British sipai te chu ‘prisoner of war’ an lo nita vek mai a ni.

Tan-in an awm lai chuan Netaji Subash Chandra Bose chuan India mi sipai tam tak an tang ve tih hriain, Singapore-ah hian Indian National Army (INA) a din a. Pu Darthawma pawh hi June ni 2, 1942-ah khan Indian National Army-ah a inpe a, INA-a a inpek hnu hian chhechhamna te neiin, Bible chungah kut nghatin, India ram tan nunna leh chakna zawng zawng hlan turin an chham a ni. Singapore-ah hian kum thum lai an awm hnuin India lam pan turin theihtawpin INA member te an in buatsaih a, Singapore atangin Malaysia, Thailand leh Burma-ah te an chho a ni. Pu Darthawma leh INA member dangte Irrawady lui kama an awm laiin British sipai te nen an intawk ta thut mai a, vanduai thlak takin British sipai te chu an hneh zo ta lova, an man ta hlawm a. Military tan inah thla hnih an khung hnuah, British sipai te chuan Bangladesh thlawhna tum hmun Dehazri ah thla hnih chhung an dah leh a, chu mi hnuah Thazari ah sawn leh an ni a, chuta tang chuan Pu Darthawma leh INA member dangte chu Calcutta ah court martial turin rail in an phur a, British sawrkar dotu pawl hel chan an chang ta a, an chanchin chu Mahatma Gandhi leh Jawarhar Lal Nehru te chuan an hria a, INA te chu hel an nih loh zia leh anni ang chiaha zalenna sualtu naran an nih zia British sawrkar chu an hrilh a, chumi hnuah erawh chuan ‘political prisoner’ an ti ta hlawm a ni.

Kum 1946 January thla khan chhuah zalen an ni a, Pu Darthawma pawh Lunglei lamah haw chhovin, British sawrkar chhung chu sawrkar hna leh sawrkar lam haw zawng thil reng reng ti theilo tura discharge certificate pek a ni. Pu Darthawma chu India in independent a hmuh hma zawng kha chuan CID hovin jail ah khung tumin an chang reng mai a, nitin a kalna lam apiangah enthlak a ni thin.

India chuan zalenna a hmu ta a, amaherawhchu Pu Darthawma leh INA member dangte chu tharum thawh pawl a ngaih an ni a, zalenna sual chhuaktu te zingah telh an ni ta hauh lo mai a. Indira Gandhi, Prime Minister a rawn nih khan India ram kalhmang ngaihtuahin pawm loh theih lovin an awm ta a. Pu Darthawma hi India zalenna a sual dan ziak chhuak tura tih a ni a, a statement chu Home Department, Delhi-ah thawn thlak a ni. Home Department chuan an record office Lucknow ah an thawn leh a, Lucknow- ah hian British sawrkar record nena endik a nih hnuah Pu Darthawma hi ‘Freedom Fighter of India’ ah pawm a ni a, India zalenna sualtute tana lawmman an siam Tamrapatra Award chu August ni 15, 1973 khan a dawng a ni. Lunglei-ah a nupui fanau te nen chengin, fapa pali leh fanu pahnih a nei a, July ni 21, 2019-ah a boral thlengin Lunglei-ah a khawsa a ni.