No.2064/2021-2022

Aizawl, the 31th August, 2021: Aizawl Municipal Corporation (AMC) chuan vawiin chawhma dar 11 khan Board of Councillors' meeting a nei a; meeting hi AMC Mayor Pu Lalrinenga Sailo-in a kaihruai a ni.

Zawhna leh chhanna hun hman a ni hnuah, Executive Councillor Pu Lalringliana chuan Annual Financial Statements 2020-2021 a pharh a, rorel chhunzawm nghal a ni.

AMC-in Aizawl khawchhung a parking area hmun 51 enkawl tura a thlante nena an inremna (contract agreement) chu March ni 31, 2022 thleng pawhsei a remti a. Bawlhhlawh paih chungchang sawiho a nih bakah Diesel man a san zel avanga Aizawl khawpui bawlhhlawh paihna motor neituten harsatna an tawh avangin motor hiring rate tuna hman lai atanga 5% a tihpun a remti bawk a ni.

Khawpui thianghlim zawk leh mawi zawk kan neih theihna tura hmalak a tul zia Councillor ten an sawihova, khawpui chhunga ran vulh, a bik takin vawk vulhin khawpui chhung vawn thianghlim kawngah harsatna a thlen chungchangte ngun taka an sawiho hnuah thutlukna siamin, AMC chuan khawpui chhunga vawk vulh chungchangah mipui zirtirna (awareness campaign) nasa taka kalpui nise an ti a ni.