No.2065/2021-2022

Aizawl the 31st August, 2021 : NABARD hnuaia NABFOUNDATION hmalakna peng pakhat ‘My Pad My Right’ chu vawiin khan Lunglei District chhunga hman turin High Powered Committee Vice Chairman Pu Lawmawma Tochhawng chuan Rahsiveng YMA hall-ah a hawng. ‘My Pad My Right’ hi Self Help Group (SHG) te tana duan niin eizawnna leh entrepreneurship lam kawnga hma an sawn theihna tura ruahmanna siam a ni a. He Project kaltlang hian Lunglei Ainawn Self Help Group-ah sanitary pad siamna khawl bun niin an sanitary pad siam chhuah te hi market-a hralh chhuah tura ruahmanna siam ani ang.

He hmalakna bul tumtu NABARD-a an District Development Manager Pu Evan T Munsong sawi danin he My Pad My Right hnuaiah hian hmeichhiaten inhlawh fakna an hmuh dawn bakah sanitary pad awlsam zawka an hmuh theih nana sawrkar laipuiin ruahmanna a siam a nih thu sawiin, he programme hi Self Help Group changtlung zawka kalpui theihna tur a tana siam a nih thu a sawi a ni.

He huna khuallian Lunglei High Powered Committee Vice Chairman Pu Lawmawma Tochhawng chuan hmeichhiate hamthatna atana NABFOUNDATION-in ruahmanna a siam chu lawmawm a tih thu a sawi a, he programme hian hmeichhiate tan nghawng thui tak a nei tih a sawi bakah NABARD kaltlanga hmeichhiate mamawh phuhrukna tur, Mizorama a vawikhat nan Lunglei ngeiah siam chhuah a ni ve thei ta chu lawmawm a tih thu a sawi a ni.

Vawiin a My Pad My Right Lungleia hawnna hun hmanah hian Lunglei Ainawn Self Help Group te leh Dr. LV. Vanlalchhanhimi, MD (Obs & Gynae) bakah YMA Sub-Headquarters Lunglei President Pu Lalrotluanga te an tel bawk a ni.