No.2047/2021-2022
Aizawl, 30th August, 2021 : Mizoram Police chuan August ni 27, 2021 khan a hnuaia tarlan ang hian thuchhuah an siam :

Tun hnai maiah Mizoram Police hnuaia Sub Inspector leh Constable hnaruak awm dil theih angin thu dik lo, webpage pakhat www.fresherjobnearme.com-in link, fresherjobnearme.com/mizoram-police-jobs/ hmangin a thehdarh mek a. He webpage-ah hian Sub Inspector leh Constable hna (contract/consolidated pay basis) online hmanga dil theih a nih thu Mizoram Police-in notification a chhuah anga ziah a ni a. Hei hi thu dik lo leh inbumna a ni tih kan inhriattir a ni.

Mizoram Police-in hetiang hnaruak dilna advertisement hi engmah chhuah a nei lova, he advertisement lem thehdarh mek lakah hian fimkhur turin mipuite kan inngenin kan inhriattir a, he thu dik lo thehdarhtute hi chhuichhuak turin hma lak nghal a ni.