India ram hmun dangte rualin Bilkhawthlirah pawh Independence Day vawi 71 na chu Bilkhawthlir Playground-ah ropui taka lawm a ni a, he hun hi 6th Serlui Constituency Bialtu MLA Pu K.Lalrinthanga Parliamentary Secretary chuan khuallian niin a hmanpui.
Pu K.Lalrinthanga chuan hnam puanzarh pawtparhin, Parade contigent-te chibai buk a chhang let a. Zalenna ni kan lawm hian ram tan inpekna thuk zawk min neihtir se a duhthu sawiin, India ram zalenna atana an nunna hlu tak hlantute zahna chibai a buk a. Sawrkarin a hnathawh te mipui tan lang tlang leh rin tlak a nih theih nan kawng hrang hranga hma a lak mek thu sawiin, khawtlang leh ram, sum leh pai dinhmun chawikanna turin nasa taka tanlak a nih thu a sawi.
Khuallian chuan Ram chhung muanna boruak vawnhim leh mipuite himna chu sawrkar ngaihpawimawh ber a ni fo tih a sawi a. Khuallian hian Bilkhawthlira sawrkar hmalakna hrang hrang leh khawtlangin hmasawnna a hmuh hrang hrangte a tarlang bawk a ni.
Khuallian hian School parade contingents-te lawmman a sem nghal a, parade-a tel te hi category hnih, Junior leh Senior category-a then an ni a. Junior category-ah hian school 9 telin, heng zingah hian Hmarveng Presbyterian English School chu pakhatna an ni a, UPS Bilkhawthlir chu pahnihna niin, Kharzawl UPS chu pathumna an ni. Senior category-ah hian 3 awmin, Bilkhawthlir Higher Secondary school chu pakhatna an ni a, Bilkhawthlir High school pahnihna niin, Govt. T.Robert High school chu pathumna an ni bawk.
Pu Liantluanga Chohte pawhin Freedom From Open Defecation Week kharna hun hmangin, sawrkar laipuiin Open defecation Week atan kum 2017 August ni 9-15 kha a puang a, Mizoram hmun hrang hrangah hman niin, Kolasib-ah pawh August ni 10 khan hawnna hun hman a nih thu sawiin, kharna hun remchang tak mai a awm chu lawmawm a tih thu a sawi a. Bilkhawthlir chu tunhma atanga khaw fai ni thin leh fai lawmman pawh lo la tawh an nih thu sawiin, pawn lera ek awm lohna khua ni zel tur leh khaw fai ni zel tura tan la turin a fuih a ni.