Vawiin chawhnu khan Pu John Rotluangliana , Minister Food & Civil Supply, Transport, Tourism Bialtu MLA ni bawk chuan Independence Day puala buatsaih Football, Volleyball leh Badminton Tournament kharna hun leh lawmman semna a nei.  

Kharna hun GSA Playground-a neih ah hian Pu John Rotluangliana Minister chuan Mamit mipui ten zalenna ni an ngaih pawimawh thu leh he mi puala buatsaih infiamna hrang hrangte hlut nachang an hre chho zel chu lawmawm a tih thu a sawi a. Tournament tan ni atanga Pathian hruaina-a khawchhe tak karah pawh khaihlak awm lova tluang taka hman chhoh a ni chu lawmawm hle a ni a ti, tun tuma chak zota lo infiammite pawh hmalam hun atana inbuatsaihna tha zawk nena hlawhtlinna nei tura tan la sauh sauh turin a fuih a ni.

Independence Day puala buatsaih Football Tournament hi 1st Division leh 2nd Division ah then a ni a, Mamit District chhung khaw hrang hrang atangin 1st Division ah  Team 9 telin 2nd Division-ah hian team 10 an tel a. 2nd Division-ah hian Suarhliap Football team te chuan Champion dinhmun hauhin 1st  Division-ah hian Mamit Venghlun Football Club te chuan champion nihna an hauh a ni. Volleyball ah pawh hian 1st leh 2nd bakah Hmeichhe Team atangin an vaiin Team 15 an tel a, 1st Division-ah hian Zawlnuam Volleyball Club te chu pakhatna niin, 2nd Division-ah Deborah Volleyball club Mamit te an ni a, Hmeichhe Volleyball team ah hian Mamit Hmarveng Volleyball te chuan chak ber nihna an hauh a ni. Badminton ah hian District chhung khaw hrang hrang atangin infiammi mi 254 telin Category hrang hrang pakua ah inelna neih a ni bawk.